VOV4.Jarai-Mơguah lơ 29/7, Khul git gai mơ̆ng dêh čar ngă tui hơdôm hơdră pơtrun mơ̆ng thun 2021-2025, jơnum lăng nao rai amăng tivi hăng djop tơring čar, kiăng pơtong glăi kơ boh tơhnal ngă tui hơdră dêh čar pơtrun 6 blan akŏ thun 2022; pok pơhai hơdôm bruă ngă tui dơ̆ng, hơdră pơsir bruă 6 blan rơnuč thun 2022. Kơ-iăng Khua dêh čar, ơi Phạm Bình Minh-Khua git gai mơ̆ng gơnong dlông hơdôm hơdră pơtrun ƀơi dêh čar ngă tui mơ̆ng thun 2021-2025 git gai jơnum.

Ƀơi mông jơnum, khua mua djop ding jum, anom bruă hăng djop tơring čar hơmâo lăi pơthâo tơlơi tơnap tap gleh glar, gun gan; pơtum pơčrông sai, rơkâo đĭ hơdră pơsir kiăng rŭ glăi hơdôm anŏ aka dưi ngă thun blan rơgao, pơtrut ngă tui tañ hăng tŭ yua hloh lu hơdră pơtrun mơ̆ng dêh čar amăng 6 blan rơnuč thun 2022 dơ̆ng. Kơ-iăng Khua dêh čar ơi Phạm Bình Minh pơtă pơtăn, djop ding jum anom bruă tañ čih pơkra hră pơtrun, tui hluai tơlơi dưi mơ̆ng pô pioh kơ djop tơring čar ba yua ngă tui; djop tơring čar, ƀôn prong git gai khut khăt hloh, pok pơhai tŭ yua 3 hơdră bruă tơhnal dêh čar pơtrun, kiăng gir run truh rơnuč thun khom ngă giong, mă yua prăk čan hơmâo pơpha brơi yua kơ bruă čar amăng thun 2022.

Nay Jek: Pơblang