Mông ngă lơphet pok phun kơdrưh biă hăng tơlơi gum hrŏm mơ̆ng rơbêh kơ 100 čô mơnuih thâo tơlơi đưm, pơdah hơdôm tơlơi yun suang čing hơgor čơkă khua pơ ala hăng tuai čuă lăng. Hrŏm hăng hơdôm grŭp atông čing hơgor lĕ hơdôm grŭp adôh suang, suang ană rup, pơhrôp djă jă gru grua bôh thâo đưm mơ̆ng djuai ania Jarai hăng Bahnar.

Amăng rơwang jơnum ngui, Grŭp pơphun jơnum ngui dô̆ pơpha lu anih anom pơdă prưng gơnam djă hơdor pioh, phara ƀơi anai, gơnam mă mơ̆ng đang hmua plơi pla ƀuh rơđah kah hăng kơphê, tiu, pơtơi glai, tơpai čeh, rơbung krô, akan thát lát ia krông Sê San; hơdôm anih pơdă gơnam pok phun bruă mă mơ̆ng hlăk ai, đah kơmơi; gơnam mơ̆ng hơdôm anom mă bruă hrŏm gah đang hmua ƀơi tơring glông Čư̆ Păh. Rơwang hrơi tơjuh Bơnga ang - Čư̆ apui kơdir Čư̆ Đang Ya thun 2024” amra pơphun truh abih lơ 10/11. Hrŏm hăng hyu hơduah ĕp anô̆ hiam mơ̆ng čư̆ apui kơdir hăng ia hiam bơnga ang, tuai čuă lăng hmâo tal găn rơgao ƀơi anăp mơñam rêu, rơngaih mơñam băn ao hrŏm hăng ƀing thâo bruă đưm, dưi ngui hơdôm tơlơi ngui đưm ƀơi mông jơnum ngui kah hăng: Tun gai, đuăi gai sưng, dui hrĕ, kơplŏng kơsăk, đĭ čư̆./.