VOV4.Jarai - Lom lơ 15/4, ƀơi Ƀirô mă bruă Gong gai dêh čar, Kơ-iăng Khua dêh čar ta ơi Lê Văn Thành git gai jơnum lăng nao rai mơng ataih hăng hơdôm tơring čar, ƀôn prong kơ ngă giong tơlơi Pơkă kual pơđĭ kyar apui lơtrik dêh čar rơwang mơng thun 2021-2030, tơhnal lăng truh thun 2045 (Pơkă kual apui lơtrik 8). Klah čun mông jơnum, Kơ-iăng Khua dêh čar ta ơi Lê Văn Thành pơsit yôm hơdôm tơlơi gum pơhiăp amăng mông jơnum hăng lăi lĕ, hơdôm tơlơi gum pơhiăp pơdah pran pơsit, bruă gơgrong, kiăo tui bôh yôm Jơnum, gum pơhiăp lu tơlơi dơlăm, yôm phăn kơ bruă pơkă kual apui lơtrik 8. Yua anun, bruă pơkă kual anai dưi hmâo jar kơmar hăng hơdôm tơring čar, ƀôn prong, anom bơwih ƀong, mơnuih tuh pơplai dô̆ tơguan biă kiăng pơsit jơlan gah lom tuh pơplai pơđĭ kyar apui yua lăi hrom, apui lơtrik lăi ha jăn amăng rơwang pơ̆ anăp. Kơ-iăng Khua dêh čar ta ơi Lê Văn Thành lăi rơđah lăng bôh tŭ yua lŏn ia, djuai ania nao hlâo, blung hlâo lĕ tơlơi pơmin hluh gah amăng git gai ngă giong bruă Pơkă kual apui lơtrik 8 mơng Gong gai dêh čar, Khua dêh čar./.

Siu H’ Prăk: Pơblang