VOV4.Jarai - Mơguah lơ 7/4, tơring čar Quảng Trị pơphun ngă yang tŭi ñang hơdor 115 thun hrơi tơkeng Khua git gai Ping gah Lê Duẩn (lơ 7/4//1907 - 7/4/2022) hăng pơphun pơkra glăi Anih hơdor kơ Khua git gai Ping gah Lê Duẩn. Đah mơng pơđĭ tui gru grua, tơlơi gơgrong bruă, hơdôm tơlơi gum pơgôp prong mơng Khua git gai Ping gah Lê Duẩn hăng Ping gah, bruă hơkrŭ lŏn ia, Kơnuk kơna, hơdôm Ding jum, anom bruă Ping gah hơmâo lăng ba, man pơkra Anih pioh hơdor kơ Khua git gai Ping gah Lê Duẩn ƀơi plơi ñu pơ plơi Hậu Kiên, să Triệu Thành, tơring glông Triệu Phong, tơring čar Quảng Trị. Anih anai jing anih hmư̆ hing hơmâo gru grua khăp kơ lŏn ia, hơkrŭ lŏn ia mơng djŏp rơnuk, laih anun jing anih hơmâo lu gơyut gơyâo mơng jar kmar nao hơduah ĕp. Tơring čar Quảng Trị hơmâo pơsit Kơčăo bruă djă pioh, răk lui, pơkra glăi Anih pioh hơdor kơ Khua git gai Ping gah Lê Duẩn hăng prăk pioh man pơkra 45 klai prăk. Ring bruă anai tơdơi kơ ngă giong lĕ khŏm răk lui klă, pioh lui nam hơđăp, ƀu dưi pơplih ming anet prong hăng anŏ yôm hơmâo mơng đưm hlâo ôh.

Siu H’Mai: Pơblang