VOV4.Jarai - Ƀơi tơring čar Khánh Hòa glăk hơmâo 2 ring bruă pơkra jơlan rơdêh pơđuăi hmar Kơdư - Dơnung ataih 54km. hơdôm ding jum anom bruă glăk ječ ameč ngă 2 kơčăo bruă pơkra jơlan prong tô nao rai Vân Phong - Nha Trang hăng Kơčăo bruă pơkra jơlan rơdêh pơđuăi hmar Khánh Hòa - Buôn Ma Thuột. Hơdôm kơčăo bruă anai amra pơtruh nao rai, ngă gêh gal brơi kual Dơnung Tong Krah pơđĭ kyar tañ hloh. 8 blan laih rơgao, găn rơgao lu tơlơi tơnap tap yua klin kheng Covid-19, ayuh hyiăng ƀu lăp, Kơčăo bruă hơmâo man pơkra hơdôm glông jơlan rơdêh pơđuăi hmar Kơdư - Dơnung gah Ngŏ rơwang thun 2017-2020, glông găn nao pơ tơring čar Khánh Hòa hơmâo pơkra ječ ameč.

Jơlan luh Dốc Sạn ƀơi glông jơlan Nha Trang - Cam Lâm glăk hơmâo pơkra.

Kơčăo bruă hơmâo kah jing 2 bơnah, hơmâo jơlan Nha Trang - Cam Lâm glông rơbêh 49km, hăng jơlan Cam Lâm - Vĩnh Hảo glông 5km, hơmâo tuh pơ alin pơkra tui tơlơi kĭ pơkôl BOT hơmâo prăk mơng kơnuk kơna hăng mơnuih ƀon sang. Truh ră anai, kơčăo bruă Nha Trang - Cam Lâm rơgao laih hrơi pơkă rơbêh 1 blan, him lăng hơmâo ngă giong amăng tong krah thun 2023, tañ hloh pơhmu hăng 3 blan hơmâo pơkă blung a.

Siu H’Mai: Pơblang