VOV4.Jarai-Lơ 19/8, ƀơi tơring čar Ninh Thuận, Ding jum Tuh tia hăng sĭ mơdrô pơphun jơnum anom bruă tuh tia pơkra ming hăng sĭ mơdrô 15 boh tơring čar, ƀôn prong amăng kual Tong krah hăng Dap Kơdư tal VIII. Thun blan rơgao, 15 boh tơring čar, ƀôn prong amăng kual Tong krah-Dap Kơdư hơmâo tŭ mă boh tơhnal prong biă mă. Boh nik ñu, thun 2021, amăng kual hơmâo 2 boh tơring čar amăng 5 boh tơring čar, ƀôn prong ba akŏ hlâo hnong pơhrui glăi GRDP lu hloh amăng dêh čar ta, anun lĕ: GiaLai 9,71%, Ninh Thuận 9%, amăng dêh čar ta kơnong 2,58% đôč. Hrom hăng anun, bruă mă tuh tia pơkra ming, sĭ mơdrô ăt dŏ hơmâo mơ̆n tơlơi tơnap tap tơdu kah hăng tơlơi phiăn kơnuk kơna, hơdră pơtrun, jơlan hơdră pơkă aka ƀu hơmâo anŏ pơlir nao rai amăng kual tong ten ôh, pơtruh nao rai pioh pơđĭ kyar.

Kiăng pơsir hĭ tơlơi anai, Jơnum tal anai hơmâo pơčrông sai, kah pơpha nao rai tơdruă tơlơi thâo thăi kiăng pơsir hĭ tơlơi tơnap tap, tơlơi dŏ gun pơdjơ̆ nao amăng bruă wai lăng mơ̆ng kơnuk kơna ƀơi djop tơring čar, mơ̆ng anun ĕp hơdră pơtrut tơlơi sĭ mơdrô, pơjing rai bruă mă djru pơđĭ kyar sĭ mơdrô ƀơi rĭm boh tơring čar hăng đơ đam amăng kual.

Nay Jek: Pơblang