Mrô prăk anai dưi mă yua pơkra glăi, hơkrŭ glăi črăn jơlan ataih 11,4km găn să Dak Plao, tơring glông Dak Mil. Hơdôm mơta bruă pơkra glăi lĕ atur jơlan, rŏng jơlan, hnoh ia pơđoh dua bơnah hăng glông pŏng lăi pơthâo.

Hrơi blan pơkra glăi amăng 6 blan hăng giong amăng rơnuč thun 2024. Ơi Bùi Văn Đoàn – Khua Grŭp wai lăng rơwang bruă pơkra glăi jơlan (Gơnong bruă wai lăng jơlan nao rai dŭ pơgiăng tơring čar Dak Nông) brơi thâo, ră anai bruă pơkra glăi, hơkrŭ glăi dưi hmâo hơdôm bôh anom man pơkra ngă tui laih rơbêh kơ 10% mrô bruă, pơhlôm rơnoh bruă ba tơbiă. Jơlan 14C găn tơring čar Dak Nông ataih rơbêh kơ 162 km, pơphun mơ̆ng tơring glông Buôn Đôn, tơring čar Dak Lak đuăi rôk tui guai dêh čar gah tơring čar Dak Nông truh tơring glông Bù Gia Mập, tơring čar Bình Phước. Anai lĕ jơlan bruă yôm mơ̆ng dêh čar, hmâo bruă mă yôm phăn pơđĭ kyar bơwih ƀong – mơnuih mơnam ƀơi guai dêh čar tơring čar Dak Nông, djru ngă tui ba glăi bôh tơhnal bruă jao pơgang rơnuk rơnua plơi pla lŏn ia kual Dap Kơdư./.