VOV4.Jarai - Ngă lơphet 97 thun Hrơi Hră pơhing hơkrŭ Việt Nam mơguah lơ 21/6, ƀơi Hà Nội, Anom pơtô bruă Ping gah, Ding jum pôr pơhing, Khul mơnuih čih hră pơhing Việt Nam, Hră pơhing Nhân dân ngă hrŏm pơphun tơlơi bơkơtưn “Akŏ pơjing anih mă bruă tui gru hiam amăng hơdôm anom bruă čih tơlơi pơhing phrâo” anăp nao hrơi ngă lơphet 100 thun Hrơi hră pơhing hơkrŭ Việt Nam (21/6/1925-21/6/2025). Bruă pơphun anai kiăng pơđĭ tui tơlơi thâo hluh, gơgrong bruă mơng ping gah, khua mua anom bruă čih tơlơi pơhing, mơnuih čih tơlơi pơhing kơ tơlơi yôm mơng gru hiam hăng tơlơi đĭ kyar mơng lŏn ia, ăt kah hăng tơlơi pơđĭ kyar mơng rim anom bruă pôr pơhing, anŏ klă, anŏ yôm mơng hơdôm tơlơi pơhing, kơdrưh, tơlơi đăo gơnang mơng pô čih tơlơi pơhing phrâo. Phun ñu lĕ akŏ pơjing anih mă bruă pôr pơhing klă, pô čih hră pơhing hơmâo tơlơi pơmin klă, bang hyu kiăng abih bang ngă tui, bơkơtưn hrŏm kiăng abih bang anom bruă čih tơlơi pơhing phrâo ngă klă tơlơi gơgrong bruă mơng hră pơhing hơkrŭ amăng bruă djă pioh, pơđĭ tui gru grua boh thâo Việt Nam pơplih klă, djă gru djuai ania.

Siu H’Mai: Pơblang