VOV4.Jarai - Hăng bruă pơlir hơbit hăng mơnuih ngă đang hmua pơjing rai gơnam klă hiam hơdjă mơng bruă pla truh kơ pơkra pơjing gơnam ƀong, jai hrơi lu mơnuih hlăk ai ƀơi tơring čar Daknông hmâo pơphun truh kih laih, hrưn đĭ ngă pơdrong kơ drơi pô hăng plơi pla.

Amăng hơdôm hrơi tết, hơdôm anih anom sĭ kơ phê mơñum Enjoy ƀơi plơi prong Gia Nghĩa (tơring čar Daknông) mơng mơnuih bơwih ƀong hlăk ai Lê Văn Hoàng leng kơ bă ƀol kơ mơnuih nao mơñum. Hlâo kơ anun, amăng rơwang dô̆ čơlah mơnuih mơnam yua kơ klin Covid-19 gluh đĭ, sang bruă hmâo ngă giong glông hơdră pơkă ngă tui hơdră phrâo mrô, ba hyu sĭ dong ƀơi hơdôm anih anom phrâo tui jơlan Internet, kơsem min pơlar gơnam phrâo kah hăng ca-cao, sô-cô-la, ƀơ ca-cao, mắc-ca. Truh kih anai hmâo djru laih ayong Lê Văn Hoàng, Khua Sang bruă bơwih ƀong mơnuih ƀôn sang sa ding kơna kơ phê Bazan Daknông ư-ang dưi pơanăn amăng Top 10 “Hlăk ai pơphun bruă thâo rơgơi thun 2021” amăng đơ đam dêh čar.

Pơphun bruă mơng sa anih sĭ mơdrô kơ phê mơñum anet ƀơi Gia Nghĩa pơkĕ hrom pơkra tơpung kơ phê, ră anai ayong Lê Văn Hoàng hmâo pơlar laih 10 bôh anih sĭ kơ phê mơñum hmâo anăn Enjoy Coffee, pơlir hrom mơnuih ƀôn sang ƀơi anai pơjing kual pla hơdôm rơtuh ektar đang kơ phê hơdjă.

“Kâo khom pơsit na nao hlơi pô, hăng pran jua hrưn đĭ, lom mơ̆ ƀu dưi pơanur mơnuih ngă đang hmua lĕ khom thâo hluh lĕ ta akă djop pran, ta pơwot glăi ngă mă pô. Tơdơi kơ ngă hăng hmâo anih pioh sĭ, dưi pơđĭ kyar lĕ ta amra dưi pơanur ƀing gơñu. Ta khom hmâo pran jua anun na nao, yap wot kah hăng tơlơi gah kâo ngă rai gơnam tam phrâo ăt tui anun mơn. Thun anai amra ƀu dưi ngă rai gơnam tam anun lĕ thun dơi dong, samơ̆ pô hmâo djă pioh laih tơlơi thâo thăi kơ gơnam tam. Anun lĕ bưp tơlơi tơnap ta amra ƀu pơdơi ôh mơ̆, khom ĕp jơlan pơkon kiăng nao amuñ hloh”.

Ayong Lê Văn Hoàng amăng mông ngă lơphet ƀơk anăn Top 10 “Hlăk ia pơphun bruă mă thâo thun 2021” (pô dŏng tal 3 mơng gah iao)

Kơđai glăi hăng tơlơi hur har mơng anih sĭ mơdrô kơ phê mơñum, anih anom pơkra trà khăm mah Anna Food mơng amai Lê Thị Ly Na hơđong biă amăng krah hơdôm đang phun bôh, dơnao rông akan ƀơi tơkai kơdư kơtuai Gia Nghĩa. Hăng anô̆ gal lĕ djuai gơnam tam ƀu lu ƀơi Dăp Kơdư, trà khăm mah Anna hmâo ƀơ ƀrư̆ anăp nao ba sĭ kơ dêh čar tač rơngiao hăng pơphun sĭ ƀơi dêh čar tač rơngiao. Rơnuč thun 2021, amai Lê Thị Ly Na, pô anom pơkra trà khăm mah Anna Food hmâo ư-ang lĕ sa amăng ƀing hlăk ai plơi pla mơbruă đơ đam dêh čar dưi hmâo mă pri bơni Lương Định Của tal 16 yua Khul hlăk ai rơnuk Hồ Chí Minh dêh čar ta ƀơk brơi. Truh kih hăng gơnam trà khăm mah, ñu glăk pơlar dong hơdôm gơnam pơkra trà djŏng amăng hruh, tơpung khăm mah, ia khăm mah mơxăm mă pô; hăng pok anih pơkra ƀun krô mơng braih Buôn Čoă, añăm hla rok hơbơi pơtơi Dăk Song. Amai Lê Thị Ly Na brơi thâo hơdôm gơnam anai leng kơ hmâo gơnam pioh pơkra mơng OCOP hơdjă ƀơi anai.

“Kâo ƀuh kơnong kơ pơkra dơlăm anun kah mơng hmâo nua gơnam kơ neh wa. Lom mơ̆ pô pơkra kiăng đĭ nua gơnam, lĕ ta blơi mut mơng neh wa hmâo nua hloh ƀiă, ta pơhlôm bôh tŭ yua kơ mơnuih ngă đang hmua, sit ñu lĕ hăng jơlan gah tŭ yua klă mơng pô, gơñu amra ngă tui”.

Amai Lê Thị Ly Na hăng sa dua mơta gơnam tam mơng anom pơkra gơnam Anna food

Tui hăng ayong Châu Ngọc Lương, Khua git gai Khul hlăk ai tơring čar Daknông, hơdôm thun jê̆ hăng anai, jai hrơi jai hmâo dong lu ƀing hlăk ai pơphun bruă truh kih mơng bruă ngă tui hơdôm gơnam tam pha ra mơng plơi pla. Djru pran kơ hlăk ai, Khul hlăk ai hmâo jak iâu ƀing juăt bruă ba jơlan hlâo nao lăi pơthâo, ƀudah ră ruai lăng nao rai mơng ataih hăng hlăk ai kơ pơphun bruă. Hrom hăng bruă djru pơhrăm brơi pơdŏng rơwang bruă, pơphun bruă grŭp ăt djru mơn hlăk ai dưi čan prăk mă kơmlai ƀiă mơng Keh prăk lŏn ia kơ bruă mă, Sang prăk gah hơdră bruă mơnuih mơnam... hăng abih bang prăk brơi čan giăm truh 700 klai prăk. Kơnong kơ Keh prăk djru hlăk ai pơphun bruă mơng Daknông thun phrâo rơgao hmâo hloh kơ tơhnal 6 klai prăk, djru ƀing hlăk ai ngă tui tơlơi pơmin pơphun bruă pơčeh phrâo. Ayong Châu Ngọc Lương, brơi thâo:

“Hlăk ai Daknông ră anai pran jua, hor kơ bruă, pran hrưn đĭ pơphun bruă lĕ mơ-ak biă. Hlăk ai hluai tui hơdôm tơhnal djă pioh mơng pô kiăng pơdŏng hơdôm rơwang bruă pơphun bruă mă hăng bôh tơhnal rơnuč thun 2021 brơi ƀuh laih lu gơnam pơphun bruă mă mơng Daknông gum hrom pri bơni hlăk ai bơwih ƀong huă yua kơ kơnuk kơna pơphun hmâo laih hơdôm pri prong, rơđah biă ñu lĕ hmâo 4 mơta gơnam tam. Hlăk ai hmâo mă yua đut hlah hơdôm anô̆ gal gah ayuh hyiăng, tơlơi lŏn mơnai mơng Daknông kiăng hmâo hơdôm gơnam bơwih ƀong lăp djơ̆”.

Ngă tui pran hlăk ai, hur har pơčeh phrâo hơdôm tơhnal gal mơng plơi pla, hlăk ai Daknông glăk yak đĭ kơtang tit kiăng ngă pơdrong kơ sang anô̆ hăng plơi pla lŏn ia./.

            Minh Huệ: Čih – Siu H’ Prăk: Pơblang