Him lăng jơnum anai amra pơphun dong mơng lơ 5-7/7,  tŭ yap 2 tơlơi pơtrun kơ ruah mơnuih apăn bruă hăng sem lăng, tŭ yap 22 tơlơi pơtrun bơdjơ̆ nao hơdôm bruă tuh pơ alin man pơdong, bơwih ƀong huă, mơnuih mơnam ƀơi ƀon lan. Kơ bruă ruah mơnuih apăn bruă, pơ ala Jơnum min mơnuih ƀon sang tơring čar Gia Lai, ơi Trương Hải Long - Khua Jơnum min mơnuih ƀon sang tơring čar Gia Lai pơđok hră rơkâo ruah ơi Phạm Minh Trung - Khua gơnong bruă wai lăng ayuh hyiăng rơhuông adai ngă ding kơna Jơnum min mơnuih ƀon sang tơring čar.

Tơdơi kơ mông plĕ hră, ơi Phạm Minh Trung hơmâo 62/63 pok hră dong yua. Him lăng, amăng jơnum anai, Khul pơ ala mơnuih ƀon sang tơring čar Gia Lai amra sem lăng 22 črăn tơlơi pơtrun mơng Jơnum min mơnuih ƀon sang tơring čar Gia Lai. Amăng anun, hơmâo lu črăn tơlơi pơtrun yôm phăn anun lĕ: pơplih pơkra akŏ bruă tuh pơ alin man pơdong thun 2023 mơng ngăn drăp tơring čar; pơplih akŏ bruă tuh pơ alin man pơdong gap ƀrô; pơplih mă yua lŏn glai rưng hơdai nao bruă pơkŏn dong kiăng kơ pioh man pơkra jơlan pơkuh nao rai hơdôm boh să amăng tơring glông Kông Chro.

Ƀơi plơi prong Kon Tum, Khul pơ ala mƀs tơring čar Kon Tum pok pơhai Tal jơnum lok 5, Khua pơ ala mơnuih ƀôn sang tal 12, rơwang bruă 2021-2026. Amăng mông jơnum, Khul pơ ala mƀs tơring čar Kon Tum amra pel ĕp, lăng tui bôh tơhnal mă bruă mơ̆ng hơdôm bôh ƀirô anom bruă tui tơlơi pơkă; bơkơtuai, pơsit tơlơi bơwih ƀong – mơnuih mơnam 6 blan akô̆ thun, pơsit jơlan gah, bruă mă phun 6 blan rơnuč thun 2023 hăng pơsit hơdôm bôh yôm pô dưi ngă.

Pơphun mơ̆ng ră anai truh lơ 7/7, Tal jơnum lok 5, Khul pơ ala mƀs tơring čar Kon Tum tal 12, rơwang bruă 2021-2026 amra pel ĕp, pơsit hăng 32 bôh yôm Jơnum min mƀs tơring čar lăi pơthâo amăng tal jơnum, amăng anun hmâo sa dua hơdră bruă yôm phăn, kah hăng: Rơnoh djru pioh ngă tui Jơlan hơdră pơpha anih mơnuih ƀôn sang dô̆ yua kơ ayuh hyiăng ƀu klă ngă, tơnap tap, guai lŏn ia, mơnuih đuăi hyu dô̆ hơdơ̆ hor, kual glai mă yua lu mơta amăng tơring čar; pơpha ngăn rơnoh djru pơđĭ kyar anom mă bruă hrŏm; pơplih pơkra kơčăo bruă ngă tui hơdôm jơlan hơdră pơkă mơng lŏn ia thun 2022, 2023 hăng pơkă hlâo jơlan gah pơpha kơčăo bruă tuh pơplai bruă hrŏm thun 2024./.