VOV4.Jarai - Mơguah lơ 21/6, Khua dêh čar ơi Phạm Minh Chính git gai Jơnum lăi pơthâo bruă dưm dăp čuk pơkra hăng tuh pơ plai kual lŏn dăo ia krông Cửu Long thun 2021-2030 amăng lơ 21/6/2022 ƀơi ƀon prong Cần Thơ, hơmâo khua mua mơng hơdôm anom bruă kơnuk kơna, tơring čar kual lŏn dăo ia krông Cửu Long, ƀon prong Hồ Chí Minh, ƀing tuh pơ plai, anom bơwih ƀong prong, ƀing ngă gŏp pơđĭ kyar, ƀing rơgơi kơhnâo. Mông jơnum hơmâo lăi pơthâo Jơlan hơdră ngă bruă mơng Kơnuk kơna kơ hơdră pơđĭ kyar bơwih ƀong huă mơnuih mơnam hăng pơhlôm pơgang lŏn ia, rơnuk rơnua plơi pla kual lŏn dăo ia krông Cửu Long tui tơlơi phiăn dưm dăp pơkă hơnong hlâo; pơtrut tuh pơ plai kơ kual lŏn dăo ia krông Cửu Long.

Mông jơnum

Ƀơi mông jơnum, ƀing khua pơƀut lăi nao hơdôm bruă dưm dăp, čuk pơkra kual lŏn dăo ia krông Cửu Long rơwang thun 2021-2030, lăng nao pơ anăp truh thun 2050. Khua dêh čar ơi Phạm Minh Chính lăi, kiăng pơtrut tui dong hơdôm tơlơi hơmâo, biă ñu lĕ ană mơnuih, tơlơi kiăng khŏm pơđĭ kyar tañ hăng hơđong, lăp djơ̆ hăng kual lŏn, tơlơi yôm mơng kual; lăng anai jing bruă kiăng ngă na nao, yôm phun, yôm biă hăng bruă đĭ kyar mơng hơdôm boh tơring čar amăng kual wơ̆t hăng amăng đơ đam dêh čar ta.

Siu H’Mai: Pơblang