VOV4.Jarai - Mơguah hrơi anai (14/4), ƀơi Ƀirô mă bruă, pơphun jơnum lok 10 mơng Jơnum min apăn bruă Khua pơ ala mơnuih ƀon sang dêh čar tal 15. Amăng mông jơnum anai, Jơnum min apăn bruă Khua pơ ala mơnuih ƀon sang dêh čar pơgôp hiăp hơdôm boh tơhnal yôm phăn kiăng mơ-it nao Jơnum tal 3 Khua pơ ala mơnuih ƀon sang dêh čar. Kơ bruă čih pơkra tơlơi phiăn, Jơnum min apăn bruă Khua pơ ala mơnuih ƀon sang dêh čar amra pơgôp hiăp kơ hơdôm akŏ bruă: Tơlơi phiăn hyuh gas (čih pơkra glăi), Tơlơi phiăn pơgang, pơgăn ataih amang sang anŏ (čih pơkra glăi), Tơlơi phiăn čih pơkra glăi, pơhrua sa, dua črăn amăng tơlơi phiăn Tần số vô tuyến điện, Tơlơi phiăn pĕl ĕp kơđi ( čih pơkra glăi), Tơlơi phiăn khăm, pơjrao (čih pơkra glăi); pơgôp hiăp kơ Jơlan hơdră čih pơkra tơlơi phiăn, tơlơi pơsit thun 2023…Kơ hơdôm bruă bơwih ƀong huă - mơnuih mơnam, Jơnum min apăn bruă Khua pơ ala mơnuih ƀon sang dêh čar pơgôp hiăp amăng: Hră lăi pơthâo mơng Kơnuk kơna lăng glăi bruă ngă tui tơlơi pơtrun mrô 42 thun 2017 mơng Khua pơ ala mơnuih ƀon sang dêh čar kơ bruă pơsir đom hnưh kaih tla mơng hơdôm khul grup brơi čan prăk; črăn tơlơi pơsit mơng Khua pơ ala mơnuih ƀon sang dêh čar kơ hơdră akŏ phun, pơđĭ kyar tơring čar Khánh Hoà; bruă kah pha prăk brơi hơdôm akŏ bruă tui jơlan hơdră hơkrŭ glăi hăng pơđĭ kyar bơwih ƀong huă-mơnuih mơnam, amăng anun, sem lăng hơdôm akŏ bruă tuh pơ alin gah jơlan hơdră hơkrŭ glăi bơwih ƀong huă hăng bơkơnar mă yua prăk amăng Jơlan hơdră hơkrŭ glăi bơwih ƀong huă-mơnuih mơnam hăng rơnoh prăk tuh pơ alin amăng rơwang gap ƀrô mơng 2021-2025.

Siu Đoan: Pơblang