VOV4.Jarai-Tlam mơmŏt lơ 4/8, ƀơi sang adoh suang ƀôn prong Hồ Chí Minh, pơphun jơnum prong pơplông jua pơhiăp đơ đam dêh čar ta tal XV thun 2022 hăng akŏ ñu “Hơdeč hmar pơblih phrâo-dŏ hrom hrưn đĭ”. Mơ̆ng rơbêh 500 mơta tơlơi pơhing ba pơplông, Khul khua mua čom puang hơmâo ruah mă 203 mơta tơlơi pơhing pioh ĕp glăi čom puang apah pri rơnuč hơdôm tơlơi pơhing phrâo, tơlơi tơña lăi glăi, tơlơi ră ruai pôr amăng brô̆, hơdră pơhiăp pôr mơtam.

Đĭ pơhiăp git gai tal pơplông anai, ơi Nguyễn Trọng Nghĩa, ding kơna khul git gai ping gah dêh čar, Khua anom pơtô bruă ping gah dêh čar lăi lĕ, tal pơplông jua pơhiăp dêh čar pơphun ƀrô amăng hrơi mông Ping gah, mơnuih ƀôn sang hăng abih bang ling tơhan amăng dêh čar ta hlăk bơkơtưn mă bruă, kiăng ngă tui khut khăt truh kih Hră pơtrun Jơnum ping gah dêh čar tal 13; ha pran jua, gum ai hơtai ngă bruă ba djop jơlan hơdră, tơlơi phiăn ping gah hăng kơnuk kơna pơtrut rŭ glăi tơlơi bơwih ƀong huă hăng pơđĭ kyar bơwih ƀong huă mơnuih mơnam dêh čar tơdơi kơ klin Covid 19 abih tui.

Khua anom pơtô bruă Ping gah dêh čar ơi Nguyễn Trọng Nghĩa đĭ pơhiăp git gai

Ơi Nguyễn Trọng Nghĩa rơkâo Gong phun jua pơhiăp Việt Nam lăi pha, anom bruă pơtui jua pơhiăp, ƀing čih tơlơi pơhing gah jua pơhiăp hnun mơ̆n hmư̆ hiăp ngă tui tơlơi pơtô yôm mơ̆ng Khua mir sir Hồ Chí Minh. Jua pơhiăp Việt Nam kiăng jing glông pơhiăp pơthâo brơi tơlơi pơhiăp, anŏ kiăng mơ̆ng djop mơnuih ƀôn sang amăng dêh čar djru kơ bruă man pơdong lŏn ia, čih pơkra jơlan hơdră djơ̆ lăp hloh, hơmâo pran kơtang amăng tơlơi hơdip ngă tui sit nik, jơlan hơdră ping gah kơnuk kơna ta pơgang hơđong kơđi čar mơnuih mơnam laih anun pơđĭ kyar lŏn ia, pok prong tui tơlơi dưi kơ mơnuih ƀôn sang ngă pô, pơđĭ tui tơlơi thâo git gai mơ̆ng Ping gah, bruă wai lăng mơ̆ng Kơnuk kơna hăng mơnuih mơnam dêh čar.

Nay Jek: Pơblang