VOV4.Jarai - Mơguah lơ 8/9, ƀơi ƀôn prong Hồ Chí Minh pơphun Jơnum sang čơ bơwih brơi tuai čuă ngui ƀôn prong Hồ Chí Minh thun 2022 (ITE HCMC 2022). Kơ-iăng Khua dêh čar ơi Vũ Đức Đam nao hmư̆ mông pơphun, hrŏm hăng rơbêh 1.500 čô khua mua lĕ ƀing khua mua mơng hơdôm anom bruă wai lăng, ƀing rơgơi kơhnâo gah bruă bơwih brơi tuai čuă ngui, hơdôm anom bơwih brơi tuai čuă ngui mơng 45 boh tơring čar, ƀôn prong amăng lŏn ia hăng 28 boh dêh čar, hăng kual lŏn. Hăng anăn “Yak hrŏm kjăp, čung ba hrưn đĭ”, Jơnum tal anai čang rơmang amra pok rơbêh 6.000 tal ƀuăn pơbưp sĭ mơdrô kơplah wah mơnuih blơi gơnam hăng hơdôm anom bruă pơdă prưng.

Mông trơ̆i bơnal pơphun Jơnum sang čơ kơ bruă bơwih brơi tuai čuă ngui ƀôn prong Hồ Chí Minh 2022

Amăng hơdôm hrơi ngui amra pơphun lu mông jơnum bơkơtuai anun lĕ mông jơnum khua mua bơkơtuai bơwih brơi tuai čuă ngui hăng anăn “Hơdră hơkrŭ hăng pơđĭ kyar bơwih brơi tuai čuă ngui jar kmar hơđong kjăp”, jơnum bơkơtuai hăng anăn “Pơtrut bơwih brơi tuai čuă ngui brơi klă hloh hăng tơlơi dưi mơng Việt Nam”, “Pơplih mă yua boh thâo phrâo amăng bruă bơwih brơi tuai čuă ngui” hăng hơdôm mông lăi pơthâo hơdôm anih čuă ngui. Amăng 3 hrơi pơphun jơnum sang čơ dong mơng lơ 8/9 truh lơ 10/9, mơnuih ƀon sang hăng tuai čuă ngui dưi hơduah ĕp hơdôm tour čuă ngui, gơnam brơi tuai čuă ngui amăng lŏn ia hăng tač rơngiao hăng lu anŏ pơhưč phrâo.

Siu Đoan: Pơblang