VOV4.Jarai - Mơmot lơ 26/3, ƀơi Hội An, tơring čar Quảng Nam, Ding jum gru grua bơkơjăp drơi jăn hăng tuai čuă ngui laih anun Jơnum min mơnuih ƀon sang tơring čar Quảng Nam pơphun Jơnum pơphun Thun tuai hyu ngui Dêh čar - Quảng Nam 2022 hăng anăn “Anih nao čuă ngui mơtah”. Thun Tuai čuă ngui Dêh čar jing tơlơi jơnum gru grua - bơwih ƀong - mơnuih mơnam hmư̆ hing, prong gưl dêh čar, jar kmar laih anun hơmâo pơphun rim thun. Jơlan hơdră pơphun Thun Tuai čuă ngui Dêh čar - Quảng Nam 2022 hơmâo pơphun ƀơi anih pơdah tơlơi adoh suang gah rơngiao Ký ức Hội An. Anih pơphun tơlơi jơnum hơmâo jua mơñi, apui hiam, hrŏm hăng rơbêh 600 čô mơnuih apăn bruă adoh suang, ƀing kơhnâo amăng plơi pla nao jơnum, pơjing rai tơlơi ngui ngor hơmâo lu mơta, hơmâo anŏ hiam phara...Anai jing tơlơi gêh gal pơƀuh rup, anŏ yôm mơng gru grua boh thâo, kông ngăn ayuh hyiăng lŏn adai hăng gơnam pơkra pioh kơ tuai hiam phara; pơtruh nao rai, ngă hrŏm pơđĭ kyar tuai hyu ngui kơplah wah hơdôm tơring čar, pơđĭ tui tơlơi kơdrưh kơ-ang, rup lŏn ia, ană mơnuih Việt Nam lăi hrŏm hăng tơring čar Quảng Nam lăi hơjăn, pơtrut rŭ glăi tơlơi bơwih ƀong gah tuai hyu ngui yua bơbeč kơtang mơng klin Covid-19.

Siu H’Mai: Pơblang