Jơnum jak iâu anai, yua Ding jum kông an, Khul pơlir hơbit đah kơmơi mut phung Việt Nam hăng Jơnum min mơnuih ƀôn sang tơring čar Lao Cai ngă hrŏm pơphun. Pơhiăp ƀơi mông jơnum, Kơ-iăng Khua dêh čar ơi Trần Lưu Quang lăi pơtong, tơlơi sat sĭ, blơi mơnuih lĕ sa amăng hơdôm tơlơi soh sat hŭi rơhyưt biă mă ƀơi rŏng lŏn tơnah. Ƀơi Việt Nam, lơ 30/7 ăt dưi ruah ngă “Hrơi abih bang ană plơi pla, pơhlôm, pơgăn sĭ mơnuih” kiăng pơtum pran jua kơtang mơ̆ng abih bang mơnuih ƀôn sang ană plơi pla, wơ̆t hăng djop sang bruă glông kơđi čar, gum hrŏm tơgŭ blah glăi tơlơi soh sat hrup anai.

Kơ-iăng Khua dêh čar ơi Trần Lưu Quang iâu pơthưr abih bang mơnuih ƀôn sang, djop anom bruă amăng dêh čar hăng tač rơngiao gum hrŏm pioh pơtrut đuăi hăng pơgăn tơlơi soh sat sĭ mơdrô mơnuih, khom tơbiă đuăi amăng tơlơi hơdip mơda mơnuih mơnam, biă mă ñu đing nao kơ ƀing čơđai muai hăng ƀing tơdu pơ-ai amăng mơnuih mơnam, kiăo tui tong ten akŏ bruă thun 2024 lĕ “Ƀu lui kơ čơđai pơpă ôh dŏ glăi gah klôn” amăng tal blah ngă hăng tơlơi soh sat anai.