VOV4.Jarai - Jơlan hơdră “Sa klăk pơčeh phrâo, djru yak rơgao tơlơi tơnap, pơčeh phrâo, pơsit pran jua dưi pơgăn glăi klin Covid-19” jing sa amăng hơdôm jơlan hơdră phun lăp dưi hmâo Khul mut phung dêh čar ta pơphun hăng pok pơhai ƀrô djơ̆ Blan mơnuih mă bruă kơ anom bơwih ƀong ƀrô djơ̆ tal blan 5 anai. Anai ƀu djơ̆ kơnong kơ tơhnal gal ôh mơ̆ ñu dô̆ pơsit pran gơgrong, kiăng mơnuih mă bruă ƀu pơdơi pơčeh phrâo.

Ayong Hoàng Anh Tuấn – mơnuih mă bruă măi mok gah anom Engineering, Sang bruă bơwih ƀong mơnuih ƀôn sang Toyoda Boshoku (Kual sang măi Nomora ƀôn prong Hải Phòng) 13 thun mă bruă lĕ hmâo truh 30 mơta tơlơi pơčeh phrâo dưi mă yua amăng bruă mă. Samơ̆ ư-ang hloh hăng lăp hơdor pioh hloh hăng ñu năng ai ñu lĕ hrơi blan hyu hơduah ĕp, kơsem min pơčeh phrâo “Dăp hơdră pơkă hrơi mông camera pơsit anih anom gơnam lom trơ̆i”.

“Khă sang bruă hmâo iâu pơhrui mơnuih mă bruă kiăng ngă bruă dong, samơ̆ ăt ƀu djop mơn. Tơdah blơi dong sa bôh măi phrâo amra rơngiă 7 klai prăk hăng tui anun sang bruă khom ngă mơng 2-3 thun pơ̆ anăp kah mơng dưi mă glăi prăk yua tuh pơplai. Mơng anun kâo kơsem min tơlơi ngă khưi khai lom pơsit gơnam tam, biă ñu hrơi mông camera pơsit anih anom gơnam tam ngă khưi khai, ba tơbiă tơlơi pơmin hrơi mông camera pơsit anih anom. Hlâo kơ pơplih hrơi mông camera pơdơi lĕ 105 giây, tơdơi kơ anun kâo pơplih dô̆ 92 giây”.

Pơčeh phrâo dưi hmâo sang bruă brơi lông lăng mơng blan 3/2021. Tơdơi kơ bôh tơhnal pel ĕp anô̆ klă, pơčeh phrâo mơng ñu dưi hmâo khua Sang bruă tŭ yap hăng mă yua hyu djop amăng anom mơng blan 9/2021 hăng nua ngă kơmlai 3 klai 800 klăk prăk sa thun. Anun lĕ tơlơi pơtrut pran jua prong prin pioh ayong Tuấn gir run yak rơgao tơlơi tơnap, pơčeh phrâo hloh dong pơ̆ anăp anai.

Sa tơlơi pơčeh phrâo thâo pơkon mơng ayong Nguyễn Thanh Tuấn, Khua ring bruă Xúc, Sang bruă Than Đèo Nai, Grŭp hơdăng bôh pơtâo Việt Nam lĕ, “Anăn mă yua amăng măi pơdah lăng nao rai mơng ataih”. Pơčeh phrâo djru hrŏ trun mông dô̆ tơguan, đĭ tui hrơi mông mă bruă tŭ yua mơng mơnuih mă bruă amăng mông mă bruă, hrŏ trun hrơi čih hră, đĭ tui mông pơtrut mơnuih mă bruă. Bruă mă yua anăn amăng măi anai djru hrŏ trun prăk rơdêh čơkă hăng ba glăi mơnuih mă bruă hăng pơđĭ tui tơlơi thâo mă yua anăn măi mok phrâo kơ mơnuih apăn bruă, mơnuih mă bruă. Ayong Nguyễn Thanh Tuấn lăi pơthâo kơ pơčeh phrâo mơng pô:

“Gơnong bruă hơdăng bôh pơtâo ƀing gơmơi mă bruă glêh glar biă, yua anun jai hrŏ trun hơdôm bruă ƀu kiăng đơi lĕ jai pơđĭ tui anô̆ klă gơnam tam, hơdăng lĕ mah jŭ mơng lŏn ia hiưm lĕ. Jai hmâo lu mông ba mut amăng bruă mă klă hloh lĕ hră pơ-ar lu. Kâo ƀơi anăp gum hrom adơi ayong ƀơi anih mă hơdăng bôh pơtâo hơdôm pluh thun laih, kâo ƀuh adơi ayong glêh glar biă hăng bruă bơwih ƀong lĕ pran pơtrut blung kiăng kâo pơmin tơbiă hơdră ngă hrŏ trun hơdôm bruă ƀu kiăng đơi hăng đĭ tui rơnoh bruă mă kơ adơi ayong”.

Jơlan hơdră “Sa klăk pơčeh phrâo – gir run yak rơgao tơlơi tơnap pơčeh phrâo, pơsit pran jua truh kih bruă pơgăn glăi klin Covid-19” mơng Khul mut phung dêh čar Việt Nam ƀu djơ̆ kơnong kơ ngă pơhư̆č lu mơnuih mă bruă gum hrom ôh mơ̆, ñu dô̆ pơphun bruă pơčeh phrâo kiăng mơnuih mă bruă hmâo pran gir run, đĭ tui rơnoh bruă hăng anô̆ klă gơnam tam. Ơi Trần Thanh Hải - Kơ-iăng Khua Khul mut phung dêh čar Việt Nam, Khua Grŭp črâo ba ngă tui Jơlan hơdră "Sa klăk tơlơi pơčeh phrâo - gir run yak rơgao tơnap, pơčeh phrâo, pơsit pran jua dưi pơgăn klin Covid-19" brơi thâo:

“Jơlan hơdră "Sa klăk tơlơi pơčeh phrâo - gir run yak rơgao tơnap, pơčeh phrâo, pơsit pran jua dưi pơgăn klin Covid-19" pơsit hmâo sa măi mok phrâo rơnuk anai, dưi tuh pơplai amăng glông hơdră phrâo măi mok amra jing yôm phăn hloh amăng bruă pơdah tơlơi pơčeh phrâo mơng pô amăng bôh nik lăi đĭ bôh thâo pơčeh phrâo mơng pô amăng plăng pơhing lăng nao rai mơng ataih mơ̆ khul mut phung hmâo pơjing. Phun than tal 2 lĕ, lăi kơ bôh thâo pơčeh phrâo mơng mơnuih mă bruă amăng ƀiă mông pok pơhai ngă tui amăng ƀiă mông ƀing ta dưi hmâo laih 250 rơbâo mơta tơlơi pơčeh phrâo, pơplih phrâo mơng mơnuih ƀôn sang đơ đam dêh čar gum hrom giăm dưm dưm hăng rơnoh hơnong ñu pơkă hrom mơng rim thun. Tơlơi anun brơi ƀuh tơdah ƀing ta hmâo pran pơtrut djơ̆ hăng hơdôm bruă mă lăp djơ̆, dưi rŭ tơgŭ đĭ bôh thâo pơčeh phrâo mơng mơnuih mă bruă lĕ, ƀing ta amra dưi hmâo hăng pơjing rai tơlơi pơplih kơtang amăng bruă mơnuih mă bruă pơčeh phrâo”.

Ƀơi lu anom bơwih ƀong, bruă pơphun, pơtrut kơtang bruă bơkơtưn mă bruă rơgơi, mơnuih mă bruă pơčeh phrâo hăng anai lĕ "Sa klăk tơlơi pơčeh phrâo - gir run yak rơgao tơnap, pơčeh phrâo, pơsit pran jua dưi pơgăn klin Covid-19" hmâo ngă hăng glăk djru mơnuih mă bruă ngă tui bôh thâo, pran pơčeh phrâo mơng pô... mơng anun, djru pơđĭ tui rơnoh bruă mă, anô̆ klă gơnam tam, bôh tŭ yua bruă bơwih ƀong huă sĭ mơdrô, djru yôm phăn amăng tơlơi pơđĭ kyar mơng anom bơwih ƀong, gơnong bruă anih mơnuih amăng khul mơnuih mă bruă lăi ha jăn hăng djru pơđĭ kyar bơwih ƀong mơnuih mơnam lăi hrom mơng lŏn ia./.

VOV1: Čih – Siu H’ Prăk: Pơblang