VOV4.Jarai - Anăp nao ngă lơphet 61 thun hơmâo tơlơi truh răm ƀăm jrao hret ƀơi Việt Nam (10/8/1961 - 10/8/2022), 75 thun Hrơi pioh kơ tơhan rơka - Tơhan djai pơsăn drơi lơ 27/7 hăng čơkă Hrơi yua mơnuih djơ̆ jrao hret dioxin Việt Nam 10/8, mơguah lơ 20/7, ƀơi Sang djă pioh gru grua tơring čar Kon Tum pơphun Jơnum pơdă prưng “Jrao hret - Tơlơi thâo hluh - Tơlơi djơ̆”. Pơphun mơng lơ 20/7 truh abih lơ 25/8, pơdă prưng anai hơmâo pơƀuh giăm 400 pok rup, hơdrôm hră, dram gơnam lăi nao: Tơlơi răm ƀăm jrao hret hăng tơlơi rơngôt jrao hret; Việt Nam pơsir hĭ tơlơi truh blah wang hăng jrao măt; bruă mă mơng Khul mơnuih djơ̆ jrao hret/dioxin Việt Nam hăng hrơi blan tơña glăi tơlơi djơ̆, tơlơi dưi kơ mơnuih djơ̆ jrao hret...

Čơkăp hrĕ pơphun pơdă prưng “Jrao hret - tơlơi thâo hluh hăng tơlơi djơ̆” Kon Tum 2022.

Thượng tướng Nguyễn Văn Rinh, Khua khul mơnuih djơ̆ jrao hret dioxin Việt Nam brơi gơnam kơ mơnuih djơ̆ jrao hret dioxin.

Hluai tui hơdôm pok rup, hră pơ-ar, gơnam pơƀuh ƀơi mông Pơdă prưng, mơnuih ƀon sang, ƀing tuai hăng gơyut gơyâo mơng jar kmar thâo hluh rơđah hloh kơ tơlơi sat răm mơng jrao dioxin ngă kơ anih hơdip, tơlơi suaih pral ană mơnuih ta; Kơ hơdôm tơlơi gir run mơng Ping gah, Kơnuk kơna, Ling tơhan, mơng Khul mơnuih djơ̆ jrao hret dioxin tơdơi kơ blah ngă laih anun wai lăng, djru ba ƀing djơ̆ jrao; gum pơgôp pơkơdong glăi bruă pơkra rai djuai phao kơtuang pơdjai lu mơnuih, dong yua bruă tơña glăi tơlơi dưi kơ ƀing djơ̆ jrao hret dioxin Việt Nam.

Siu H’Mai: Pơblang