VOV4.Jarai - Lơ 10/6, ƀơi să Ea Kpam, tơring glông Čư̆ M’gar, tơring čar Dak Lăk, Grup bpwih ƀong Xuân Thiện pơphun man pơkra kual ngă hmua hăng boh thâo măi mok phrâo Xuân Thiện - Čư̆ M’gar. Anai lĕ bruă pơphun ngă hlâo amăng lu tơlơi ngă hrŏm pơkra, rông gơnam, pơkra gơnam ƀong huă hăng boh thâo phrâo mơng Grup tuh pơ lai ƀơi tơring čar Dak Lăk, hơmâo prăk tuh pơ plai rơbêh 1 klai dolar Mi (dưm dưm hăng rơbêh 25.760 klai prăk).

Hrơi pơphun man pơkra

Kual ngă hmua hăng boh thâo măi mok phrâo Xuân Thịên - Čư̆ M’gar hơmâo prăk tuh pơ plai rơbêh 705 klai prăk, prong rơbêh 100 ektar, hăng tơlơi kiăng ngă: Ngă lăng hlâo hăng ruah mă djuai phun pla klă, mơboh, huăi hlăt kman; akŏ pơdong bruă ngă hmua mă yua măi mok boh thâo phrâo hăng jao glăi boh thâo; akŏ pơjing anom bruă pơkra gơnam, djă pioh gơnam hăng ba sĭ gơnam mơng hmua; akŏ pơjing anih nao lăng, hrăm bruă ngă hmua hăng brơi tuai hyu čuă lăng đang hmua; pơtruh nao rai pơtô bruă brơi ƀing khua, mơnuih ngă hmua thâo hơdră ngă hmua phrâo. Tui hăng akŏ bruă 3 blan tal 4 thun 2023, kơčăo bruă anai amra hơmâo ngă giong, truh 3 blan tal 1 thun 2024 hơmâo gơnam ba sĭ.

Siu H’Mai: Pơblang