VOV4.Jarai - Mơguah lơ 4/5, Jơnum lok 5 Khul apăn bruă Ping gah dêh čar tal 13 hơmâo pơphun yôm phăn ƀơi plơi prong jưh jom Hà Nội. Khua git gai Ping gah dêh čar ơi Nguyễn Phú Trọng git gai hăng hơmâo đĭ pơhiăp amăng mông pơphun jơnum yôm phăn anai.

Tơdơi kơ sem lăng djop mơta bruă mă kiăng kơ ba tơbiă amăng 6 boh tơhnal amăng mông jơnum, Khua git gai Ping gah dêh čar ơi Nguyễn Phú Trọng lăi rơđah, boh tơhnal mơ-it nao Jơnum tal anai lĕ hơdôm bruă prong hloh, tơnap tap hloh hăng yôm phăn kiăng kơ ngă pơgiong tơlơi pơtrun mơng Jơnum Ping gah tal XIII amăng djop djop akŏ phun anun lĕ: pơtrut pơđĭ kyar bơwih ƀong huă-mơnuih mơnam amăng dêh čar truh thun 2030, anăp nao truh thun 2045; kơtưn amăng bruă pơjing, pơplih pơkra amăng Ping gah hăng djop anih anom kơđi čar jai hrơi mă bruă tơpă sit, hơđong kjăp amăng djop mơta mơng phun, mơng djop anih anom, djơ̆ hăng tơlơi rơkâo amăng pơplih phrâo ră anai.

Khua git gai Ping gah dêh čar ơi Nguyễn Phú Trọng rơkâo, kiăng kơ lăi rơđah hơdôm bruă tơnap, hơmâo tơlơi pơhrăm tui hơdôm tơlơi găn rơgao hăng ba tơbiă hơdôm hơdră bruă kiăng pơsir hĭ pơ anăp anai. Him lăng jơnum amra pơphun truh lơ 10/5.

Siu Đoan: Pơblang