VOV4.Jarai - Tlam lơ 12/4, Ping gah mơng Ƀirô khua git gai pơ ala mơnuih ƀon sang ngă bruă hăng Anom bruă git gai Ping gah tum pơƀut glăi Tơlơi pơtrun mrô 19 tal 11 kơ bruă pơplih phrâo hơdră ngă bruă, tơlơi phiăn lŏn tơnah amăng hrơi blan abih bang glăk gir pơplih phrâo, kiăng truh thun 2020 dêh čar ta jing dêh čar mă yua măi mok boh thâo. Pơhiăp ƀơi mông jơnum, Khua git gai pơ ala mơnuih ƀon sang dêh čar ơi Vương Đình Huệ lăi rơđah, tơlơi gơñăm nao mơng bruă jơnum tum pơƀut glăi tơlơi pơtrun 19 hăng pơkra glăi tơlơi phiăn lŏn tơnah lĕ kiăng wai lăng, mă yua lŏn tơnah klă hloh, pơtrut đĭ kyar hơđong kơjăp, laih dong huăi hơmâo tơlơi ngă kơđi bơdjơ̆ nao lŏn tơnah.

Khua git gai pơ ala mơnuih ƀon sang dêh čar ơi Vương Đình Huệ.

Mông jơnum hơmâo pơƀut bơkơtuai, ngă rơđah hơdôm tơlơi pơplih phrâo mơng hră lăi pơthâo glăi hăng tơlơi phiăn phrâo pơhmu hăng Tơlơi pơtrun mrô 19 hluai tui tơlơi gêh gal anun lĕ Cương lĩnh man pơdong lŏn ia amăng rơnuk grun nao tui jơlan CNXH (pơhrua tui, pơđĭ kyar thun 2011), Phiah phiăn dêh čar thun 2013, kiăo tui boh thâo, tui hăng tơlơi hơmâo sit mơng tơlơi rơkâo đĭ, laih dong ngă rơđah hơdôm tơlơi bơdjơ̆ nao mơng hơdôm tơlơi rơkâo phrâo hăng bruă wai lăng, mă yua lŏn tơnah.

Siu H’Mai: Pơblang