Mơguah lơ 2/7 ƀơi Anom bruă ngă hră pơ-ar să Tân Hà Lâm Hà, tơring čar Lâm Đồng, hơdôm pluh čô mơnuih dŏ tơguan ngă hră pơ-ar, lu biă ñu lĕ ngă hră lŏn. Ơi Phạm Duy Lâm, dŏ ƀơi plơi Đức Bình nao pơ anai kah mơ̆ng thâo ƀu hơmâo dong tah gưl tơring glông, bruă ngă hră yua lŏn amra yua gưl să ngă brơi. Hơmâo ƀing apăn bruă pơtô brơi, ơi Lâm hok mơak biă, laih anun kơnang hră pơ-ar amra tañ ngă giong:“Hrơi anai nao ngă hră pơ-ar hơmâo ƀing apăn bruă pơ anai pơtô brơi, bruă hơget aka ƀu dưi ngă hlao lĕ gơñu pơkă glăi hrơi pơkŏn dong. Tui anun klă biă yơh, ăt čang rơmang ngă hră pơ-ar amuñ tañ hloh mơn”.

Ăt nao ngă hră yua lŏn mơn, yă Hoàng Thị Thanh Nhàn, dŏ ƀơi plơi B’Srê B, să Tà Đùng, tơring čar Lâm Đồng tŭ ư biă mă hăng tơlơi pơplih phrâo, apăn bruă, pơhiăp tom mơak mơ̆ng gong gai să phrâo. Yă Nhàn čang rơmang mơnuih ƀôn sang nao ngă hră pơ-ar amra hơmâo lăi glăi anŏ klă bruă bơwih brơi ƀơi plang ngă hră pơ-ar mrô:“Kiăng pok pơhai tañ, kiăng mơnuih ƀôn sang lăi glăi, klă ƀudah aka ƀu klă, 5 asar pơtŭ lĕ klă, 4 asar pơtŭ lĕ klă ƀơ ƀiă, pơhmutu tui anun. Bruă čŏm puang kiăo tui rim čô mơnuih mơn, samơ̆ lơ̆m ƀing mă bruă pơ sang să ngă bruă klă lĕ mơnuih ƀôn sang khŏm čom brơi klă yơh”.

Tơdơi kơ 1 wơ̆t hrơi tơjuh pơmut hrŏm, gong gai să ƀơi Lâm Đồng mă bruă sit nik, blung a ăt hơmâo mơn tơlơi tơnap kơ anih anom, măi mok, biă ñu pơ anih ngă hră pơ-ar. Kiăng plai ƀiă tơnap, khua mua hơdôm boh tơring pơsit ngă abih bruă ƀu djơ̆ abih mông ôh, bơ ană plơi lĕ mơnuih gơñu či bơwih brơi. Ơi Nguyễn Minh Toàn, Kơ-iăng khua Jơnum min mơnuih ƀôn sang ngă rah Khua anom bruă ngă hră pơ-ar să Tân Hà Lâm Hà, tơring čar Lâm Đồng brơi thâo, amăng hơdôm hrơi blung a, să hơmâo tŭ mă pơsir brơi hăng pơtô ngă hră pơ-ar kơ giăm 160 pok hră. Hơmâo lu bruă yua gong gai tơring glông hơđăp ngă. Samơ̆ hăng tơlơi prăp rơmet tong ten hăng pơplih phrâo hrŏm hăng ngă bruă bơwih brơi, gong gai să phrâo hơmâo ngă bruă djơ̆ tui tơlơi kiăng mơ̆ng mơnuih ƀôn sang. Ơi Nguyễn Minh Toàn pơsit:“Ƀing gơmơi hơmâo pơmin hơđăp laih, bruă ngă mơ̆ng să phrâo prong biă, ră anai giăm 100% bruă mă mơ̆ng tơring glông hơđăp jao glăi kơ să phrâo soh yơh, anun jing gơmơi hơmâo prăp lui mơ̆ng hơđăp, pơkiăo nao ƀing apăn bruă klă hloh či bơwih brơi mơnuih ƀôn sang. Hăng pran jua ngă bruă bơwih brơi jing gơmơi amra bơwih brơi mơnuih ƀôn sang klă hloh, hơdôm hră pơ-ar amra amuñ hloh”.

Pơsit anom bruă phrâo lĕ bơwih brơi mơnuih ƀôn sang, ƀơi lu boh să, phường mơ̆ng tơring čar Lâm Đồng glăk pơplih phrâo hơdră ngă bruă, pơplih mơ̆ng dŏ tơguan jing prăp lui hlâo. Lu hră pơ-ar hơmâo lăi pơthâo rơđah rơđông ƀu kiăng kiăo tui kual plơi pla ôh. Hrŏm sa mơta hră pơ-ar, mơnuih ƀôn sang, anom bơwih ƀong dưi ruah ngă ngă pơ-ar pơ să, phường anai ƀudah să phường pơkŏn anun jing gong gai ƀơi lu boh să, phường hyu ĕp mă mơnuih ƀôn sang, anom bơwih ƀong laih anun lăng ană plơi kah hăng ƀing tuai či bơwih brơi.

Tui hăng ơi Trần Nam Thuần, Khua jơnum min mơnuih ƀôn sang să Tà Đùng, tơring čar Lâm Đồng, tơdah bơwih brơi ƀu klă amra ngă lu mơnuih nao pơ să pơkŏn dong či ngă hră pơ-ar, tui anun gong gai să anun amra hơmâo mơnuih ƀôn sang pơsit ngă bruă ƀu klă. Yua hnun, gong gai să glăk pơtô lăi kiăng ngă bruă bơwih brơi mơnuih ƀôn sang, lăng mơnuih ƀôn sang, anom bơwih ƀong kar hăng ƀing tuai:“Tơlơi pơplih prong hloh mơ̆ng gong gai dua gưl lĕ pơƀut bơwih brơi mơnuih ƀôn sang hăng anom bơwih ƀong. Tơbiă mơ̆ng anun yơh, mơ̆ng hrơi blung a mơtăm, Jơnum min mơnuih ƀôn sang să Tà Đùng hơmâo jơnum, lăi pơthâo hăng abih bang ƀing khua, mơnuih mă bruă pơplih tơlơi pơmin, hơdră ngă bruă. Kiăo tui tơlơi pơhing, pôr pơthâo kơ mơnuih ƀôn sang kiăng thâo hơdră ngă hră pơ-ar jing anun ăt jing tơlơi či jak iâu mơnuih ƀôn sang amăng bruă ngă hră pơ-ar”.

Tơdơi kơ ha wơ̆t hrơi tơjuh ngă tui gong gai dua gưl phrâo ƀơi tơring čar Lâm Đồng brơi ƀuh tơlơi pơplih phrâo tŭ yua. Ƀu dŏ tơguan dong tah, hơmâo tơlơi pơplih klă hloh, djơ̆ hăng tơlơi kiăng mơ̆ng Kơnuk kơna, anun lĕ giăm ană plơi, bơwih brơi ană plơi klă hloh./.