Hăng sa amăng hơdôm bôh să phrâo akô̆ pơjing tơdơi kơ pơmut hrŏm mơ̆ng 3 bôh să hơđăp: Mỹ Chánh, Mỹ Thành hăng Mỹ Cát, să An Lương, tơring čar Gia Lai ră anai hmâo kual lŏn prong 54 km kơrê hăng mrô mơnuih ƀôn sang rơbêh kơ 6.000 čô mơnuih. Khă plơi pla prong rơhaih, mơnuih ƀôn sang lu, gong gai să An Lương hmâo pơphun tañ laih bruă mă hơđong bruă čar hăng pok pơhai hơdôm bruă jao djru mơnuih ƀôn sang. Ƀơi Anom bơwih brơi kơ bruă čar gưl să, 3 ƀut hră pơ-ar kiăng hloh dưi đing nao hmâo mrô prăk mă yua hăng pơsir ƀơi măi mok. Hơdôm mơta hră pơ-ar bơdjơ̆ nao ƀơi anăp truh tơlơi hơdip mơda mơnuih ƀôn sang kah hăng pơsit hrơi tơkeng ană, lăi pơthâo mơnuih djai, pơsit hră pơ-ar mă yua... kiăng kơ dưi tŭ mă hăng pơsir tañ. Kơnong amăng blan blung a mă bruă, să hmâo pơsir laih giăm truh 7000 mơta hră pơ-ar tui măi mok, abih bang leng kơ djơ̆ hrơi pơkă.

Sa mơta tơlơi lăp đing nao amăng hơdră mă bruă mơ̆ng să lĕ, đing nao yôm tơlơi găn rơgao lăng mơ̆ng mơnuih ƀôn sang lŏm nao mă bruă. ơi Võ Thanh Hoàng, Khua Jơnum min mơnuih ƀôn sang să An Lương, lăi pơthâo:

“Rơgao sa blan mă bruă, ƀing gơmơi ƀuh hăng bruă gơgrong mơ̆ng mơnuih mă bruă čar lăi pơthâo abih pran jua bơwih brơi klă kơ mơnuih ƀôn sang, djơ̆ tui tơlơi čang rơmang mơnuih ƀôn sang. Plơi pla đing nao biă hăng tuh pơplai kơ anih anom mă bruă, măi mok mă yua tâ̆o klă. Hơdôm bôh să, phường pơkon akă blơi prăp măi mă mrô samơ̆ anom hmâo mơnuih ƀôn sang lu anun să hmâo blơi prăp măi mă mrô hlâo dơi, pơdah ƀơi măi. Hlơi nao hlâo tĭt mrô hlâo, nao tơdơi tĭt mrô tơdơi pơjing sa tơlơi hơđong klă”.

Tơlơi pơplih anai dưi hmâo mơnuih ƀôn sang pơsit yôm. Ơi Lê Ngọc Trọng, mơnuih ƀôn sang să An Lương hăng 2 wot nao ngă hră pơ-ar amăng blan brơi thâo:

“Mơnuih mă bruă ƀơi ƀirô pơtô brơi ngă tañ, rơguăt, hră pơ-ar pơsir brơi kâo amăng hrơi anun mơtăm”.

Ƀơi să kual čư̆ siăng Canh Vinh, tơdơi kơ hmâo lŏn giăm truh 260 km2, anih anom nao rai tơnap, lu plơi pla djuai ania ƀiă kual asuek, taih, tơlơi tơnap ngă juăt rah hăng hră pơ-ar phrâo, giăm mơnuih ƀôn sang rah lĕ tơlơi dô̆ bơngot prong mơ̆ng gong gai să. Ơi Dương Hiệp Hòa, Khua Jơnum min mơnuih ƀôn sang să Canh Vinh, brơi thâo să hmâo mă bruă lông lăng hơdôm “Anih anom pơsir hră pơ-ar” ƀơi kual ataih mơ̆ng kual krah pioh bơwih brơi kơ neh wa:

  “Mơ̆ng tơlơi tơnap mơ̆ gong gai pơčeh phrâo, pơjing hơdôm anih anom pơsir hră pơ-ar kơ mơnuih ƀôn sang. Blung hlâo pơjing sa anih anom tŭ mă ƀơi plơi Canh Hiển pioh bơwih brơi kơ hơdôm bôh plơi pơ̆ ataih kah hăng plơi Canh Hiệp, plơi Canh Tiến. Anăp nao ngă tui hơdôm anih anom pioh djru mơnuih ƀôn sang. Bruă juăt mă hăng hơdôm mơta măi mok gah hơdră mă yua amra djru hơdôm bôh plơi ƀơi ataih ngă hiưm hơpă pioh mơnuih ƀôn sang tŭ mă giăm hloh, tañ pơsir hơdôm tơlơi pô kiăng ngă”.

Tơlơi jê̆ giăm anai dô̆ dưi pơdah rơđah tui khul mơnuih apăn bruă. Amai La Thị Huyền Giang, mơnuih mă bruă ƀơi Anom bơwih brơi kơ mơnuih ƀôn sang să Canh Vinh, lăi pơthâo:

“Lơm pok pơhai gong gai 2 gưl, kâo ƀuh tơlơi giăm hăng neh wa mơ̆ng plơi pla. Lơm nao mă bruă, sa dua neh wa lăi pơthâo ngă hră pơ-ar mơ̆ akă thâo rơđah pô črâo rơđah, ră ruai hăng neh wa tui tơlơi pơhiăp djuai ania ƀiă lĕ amuñ thâo hluh hloh, bruă mă hruaih hloh”.

Kơnong tơdơi kơ sa blan mă bruă hơdră gong gai 2 gưl, tơring čar Gia Lai hmâo čih pioh laih yak nao kơjăp amăng bruă pơplih bruă čar, pơplih mrô, biă ñu lĕ bôh tơhnal amăng bruă pơsir hră pơ-ar tui jơlan lăi pơthâo mơ̆ng ataih. Tui hăng plăng bơwih brơi hră pơ-ar tui măi mok Lŏn ia, Gia Lai ră anai dăp tal 6/34 bôh tơring čar, ƀôn prong kơ mrô bơwih brơi kơ mơnuih ƀôn sang hăng anom bơwih ƀong. Ơi Hồ Quốc Dũng, Ding kơna Ping gah dêh čar, Khua git gai Ping gah tơring čar Gia Lai, brơi thâo:

“Pơ̆ anăp anai tui tơlơi pơkă amra pơpha gưl truh pơ̆ să. Hơdôm bruă mă dêh čar brơi gơgrong mơ̆ng gưl tơring čar samơ̆ ƀuh gưl să pơsir klă hloh lĕ ăt dưi jao kơ să pơsir mơn. Hrŏm hăng anun ăt hmâo mơn lu tơlơi akă gal, mơnuih apăn bruă să ră anai hmâo 3 tal mơnuih apăn bruă, mơnuih mă bruă tơring čar brơi nao, tơring glông brơi nao, mơnuih apăn bruă ƀơi să. Mơnuih apăn bruă ƀơi să jơlan nao hlâo adih hmâo lu mơnuih mă bruă akă hmâo djop tơlơi găn rơgao, yua anun kiăng ngă juăt hăng bruă anai khom hmâo mông pơhrăm, pơtô juăt pioh mơnuih apăn bruă pơ̆ anăp anai dưi ngă lu bruă”.

Tơlơi pơplih phrâo, rơguăt, giăm mơnuih ƀôn sang mơ̆ng gong gai gưl să ƀơi Gia Lai tơdơi kơ sa blan pok pơhai hơdră gong gai plơi pla 2 gưl brơi ƀuh ba glăi bôh tơhnal rơđah mơ̆ng hơdră pơtrun prong mơ̆ng Ping gah. Ăt dô̆ mơ̆n lu bruă khom ngă, lu tơlơi gun kiăng pơsir, samơ̆ hăng pran jua “kơnong kơ črông lô ngă đôč” hrŏm hăng tơlơi črâo ba, gum hrŏm mơ̆ng Ping gah tơring čar hăng Jơnum min mơnuih ƀôn sang tơring čar Gia Lai, gong gai să amăng hơdră phrâo amra jai hrơi jai kơjăp kơtang, dưm kơnar bruă jao amăng rơwang phrâo./.