VOV4.Jarai - Mơng lơ 4 truh pơ lơ 13/5, ƀing čơđai hrăm anih 12 amăng đơ đam dêh čar ta amra nao čih anăn nao pơplông abih anih 12 thun 2022 amăng plang wai lăng pơplông mơng Ding jum pơtô pơjuăt. Tơlơi pơplih phrâo lĕ hlâo anun ngă hră nao pơplông amăng hră pơ-ar, ră anai čih anăn amăng plang internet, kơnong ƀing nao pơplông tui hluai amra nao ngă hră pơ-ar ƀơi gơnong bruă pơtô pơjuăt djơ̆ hăng tơlơi pơkă. Mah lĕ thun blung a pok pơhai čih anăn nao pơplông amăng plang internet, samơ̆ bruă anai pơphun gêh gal, huăi ƀuh soh glăi hăng huăi ngă rơngiă hrơi mông kar hăng ngă hră  pơ-ar tui hăng rĭm thun.

Ƀing čơđai hrăm anih 12 nao čih anăn pơplông mơng ataih amăng plang wai lăng pơplông mơng lơ 4/5 truh lơ 13/5 ƀơi sang hră gưl tlâo. Kiăng ƀing čơđai juăt, Ding jum pơtô pơjuăt pok plang internet kiăng ƀing čơđai čih anăn pơplông lông lăng. Anăn mut nao pơplông lĕ mrô căn cước công dân ƀudah mrô chứng minh nhân dân kơ ƀing čơđai sang hră. Ƀing hlơi aka ƀu hơmâo hră căn cước công dân ƀudah hră chứng minh nhân dân amra mut hăng mrô anăn yua anom bruă kông ang pơkra brơi.

Tơdơi kơ Ding jum pơtô pơjuăt pok plang wai lăng pơplông, amon Nguyễn Xuân Mạnh, čơđai hrăm anih 12, sang hră gưl tlâo Phúc Lợi, Hà Nội hơmâo mut nao laih amăng web kiăng kơ čih anăn nao pơplông abih anih 12 thun 2022. Hơmâo 1 wŏt hrơi tơjuh laih kiăng kơ čih anăn lông lăng, yua anun kơnong hơdôm mơnit đôč kiăng pơgiong čih anăn amăng 16 črăn, tañ ƀiă pơhmu hăng čih amăng hră pơ-ar.

“Lơ̆m hơmâo plang čih anăn pơplông lông lăng kâo ăt nao čih anăn mơn hăng hơmâo nai pơtô črâo brơi laih dong truh hrơi čih anăn sit nik kâo ƀuh huăi hơmâo tơlơi hơget ôh tơnap”.

Rơngiao kơ bruă huăi ngă rơngiă hrơi mông pơhmu hăng ngă hră pơ-ar, čih anăn nao pơplông abih anih 12 amăng plang internet djru brơi ƀing čơđai dưi čih pơkra tơdah hơmâo tơlơi soh glăi, bruă anai tañ ƀiă hăng djơ̆ hloh. Sa čô čơđai pơkŏn pơ Hà Nội brơi thâo:

“Bruă čih anăn online tui ră anai amuñ biă mă kiăng kơ čih djop mơta tơlơi laih dong hơdôm črăn ƀing gơmơi amra ƀu thâo rơđah ăt hơmâo hlao mơtăm, ƀing gơmơi kơnong tut nao hơdôm črăn mơ̆ hơmâo laih ƀơi anun”.

Amăng hơdôm hrơi blung a čih anăn nao pơplông abih anih 12, mrô čơđai nao čih anăn aka ƀu lu ôh, samơ̆ djop sang hră ăt jao ƀing mơnuih črâo brơi ngă hră pơ-ar. Ƀing nai pơtô ăt pơtô pơblang brơi ƀing čơđai amăng bruă ngă hră pơ-ar laih dong hơdôm anŏ pơplih phrâo mơ̆ ƀing čơđai kiăng kơđiăng. Kiăng ngă gêh gal brơi ƀing čơđai, djop sang hră lêng kơ prap lui măi komputơr dưi mut internet hơđong hăng jao bruă brơi ƀing nai pơtô gah komputơr djru brơi ƀing čơđai. Yă Huỳnh Thị Hòa Bình, Khua sang hră gưl tlâo Lạng Giang mrô 1, tơring čar Bắc Giang brơi thâo:

“Hăng bruă ƀing čơđai nao čih anăn mă amăng plang internet, ră anai ƀing čơđai amra mut amăng măi telephôn ƀing gơñu, ƀudah lĕ mut amăng măi komputơr pơ sang, bruă anai amuñ biă mă. Samơ̆, amăng hrơi blan pok pơhai sang hră ăt ƀuh ƀing čơđai bưp sa, dua tơlơi tơnap, anun lĕ ƀing gơñu phrâo hơmâo mrô mut čih anăn, tơdơi anun ƀing gơñu wơr bit. Sang hră ăt jao brơi mơnuih djru, laih dong ƀing nai pơtô ƀing čơđai anih 12 amra črâo brơi ƀing čơđai”.

Hrŏm hăng hơdôm tơlơi gal, bruă čih anăn nao pơplông abih anih 12 amăng plang internet ăt ƀuh hơmâo anŏ tơnap, anun lĕ plang internet đuăi ƀu hơđong ngă kơ sa, dua čô čơđai tơbiă mơng web lơ̆m glăk mut nao ngă hră. Hrŏm hăng anun, bruă čih mrô phường, să hiưm pă, hơdôm tơlơi hrăm tui pran hor ăt ngă kơ ƀing čơđai sư̆ rơbư̆, khŏm rơkâo ƀing nai djru brơi. Nai Bùi Thị Hồng Duyên, Sang hră pơlir hơbit Việt - Úc, Hà Nội brơi thâo:

“Juăt ƀuh plang internet đuăi ƀu hơđong ôh. Dua dong lĕ lơ̆m mut nao čih anăn, ngă hră bưp sa, dua tơlơi tơnap lĕ lơ̆m čih mrô phường, să ĕp amăng plang čih anăn bưp tơnap. Tlâo dong lĕ sa, dua tơlơi ngă ƀing čơđai sư̆ rơbư̆ lĕ ƀing gơñu amra pơplông tơlơi hrăm Angle hă ƀŭ”.

Ơi Phạm Quốc Khánh, Kơ-iăng khua anom bruă wai lăng pơplông (Ding jum pơtô pơjuăt) brơi thâo, anai lĕ tal blung a brơi ƀing čơđai hrăm anih 12 čih anăn nao pơplông amăng plang internet, yua anun Ding jum hơmâo mă yua lông lăng ƀơi 2 boh sang hră gưl tlâo kual tơnap tap amăng tơring čar Bắc Giang hăng Hoà Bình hăng boh than ba glăi brơi ƀuh ƀing čơđai mut nao čih anăn amuñ biă mă mơn.

“Ƀơi 2 boh sang hră gưl tlâo ƀơi kual tơnap tap ƀuh bruă mut nao čih anăn pơplông kơ ƀing čơđai amuñ ƀiă. Lơ̆m dŏ lăng ƀing čơđai mut nao mă yua ƀuh ƀing gơñu hur har pran jua hăng ngă tañ biă mă, 3 mơnit giong mơtăm yơh, anai lĕ yua phần mềm thâo rơgơi hăng hơmâo tŏ tui hơdôm tơlơi gum pơgôp yôm phăn mơng ƀing nai pơtô amăng bruă git gai, wai lăng hăng pơgiong plang djă pioh hră pơ-ar mơng gơnong bruă pơtô pơjuăt hăng dua boh sang hră kual tơnap tap ƀơi 2 ƀon lan 100% mrô čơđai lêng kơ hơmâo mrô pơsit anăn.”

Hăng ƀing čơđai hrăm pơplông tui pran hor, tơdơi kơ ngă hră pơ-ar čih anăn nao pơplông ƀơi gơnong bruă pơtô pơjuăt tui tơlơi pơkă, ƀing gơñu amra hơmâo anom bruă wai lăng jao brơi mrô pơsit anăn (lĕ mrô căn cước công dân hăng chứng minh nhân dân) hăng mrô kiăng kơ dưi mut amăng plang wai lăng pơplông.

Ding jum pơtô pơjuăt pơtă pơtăn, ƀing čơđai kiăng djă hơgŏm anăn hăng mrô mut amăng plang pơplông. Tơdah hlơi thơ wơr, ƀing gơñu amra nao tơl sang hră - anih čih anăn pơplông mă glăi mrô mut pơplông.

Siu Đoan: Pơblang