VOV4.Jarai - Hrơi anai lơ 7/7, ƀing čơđai sang hră đơ đam dêh čar ta sit nik pơplông abih anih 12 thun anai hăng tơlơi hrăm Ngữ văn, pơkra ƀai čih mă pô, mông pơkă pơkra ƀai 120 mơnit. Yang hrơi tlam, pơplông tơlơi hrăm Toán. Dêh čar ta hơmâo 63 Khul pơplông, hăng 2 rơbâo 243 anih pơplông. Hơmâo 38 čô čơđai F0 nao pơplông. Tui hăng tơlơi lăi pơthâo tañ mơng Ding jum pơtô hăng pơjuăt, yap truh 8 mông 30 mơnit mơmot lơ 6/7, hơmâo laih 989 rơbâo čô čơđai nao pơ anih pơplông ngă hră pơ-ar, bơ rơbêh 10 rơbâo čô čơđai aka ƀu ngă hră nao pơplông ôh. Mơguah hrơi anai, ƀing čơđai ăt ngă hră pơ-ar hlâo či pơplông tơlơi hrăm blung a anun lĕ Ngữ văn. Ding jum pơtô hăng pơjuăt brơi thâo, pơhmu hăng thun hlâo, pơplông thun anai Ding jum hơmâo pơplih mơn bruă pơphun pơplông, đah mơng plai ƀiă hơmâo čơđai pleč ƀlor, pơkra ƀai ƀu tơpă. Yua hnun, ƀing čơđai kiăng kiăo tui tơkơi pơkă, tơlơi pơtô ba mơng pô wai lăng. Tơlơi pơplông thun anai pơƀut tơña kơ hơdôm tơlơi hơmâo hrăm, hơmâo mơn tơlơi tơña tơnap ƀiă, đah mơng thâo ruah mă čơđai hrăm rơgơi, djơ̆ hăng tơlơi kiăng mơng lu sang hră gưl prong ruah čơđai kiăo tui mrô puăng anai.

Siu H’Mai: Pơblang