Mơguah pơplông gah Tơlơi hrăm Khoa học Tự nhiên, Khoa học xã hội hăng tơlơi pơhiăp tač rơngiao lêng kơ pơplông trắc nghiệm soh. Amăng anun, pơplông gah Khoa học tự nhiên, hơmâo 3 mơta tơlơi hrăm kah hăng Vật lý, Hóa học hăng Sinh học; gah Khoa học Xã hội lĕ hơmâo hơdôm tơlơi pơplông Lịch sử gru phun đưm, tơlơi hrăm Điạ lý hăng Giáo dục công dân pioh kơ ƀing pơplông kiăng tŭ mă hră pơsit hrăm abih anih 12 đôč. Abih bang tơlơi pơplông, sa tơlơi pơplông amăng 50 mơnit.

Tui hăng tơlơi jŭ yap mơ̆ng Ding jum Pơtô hăng Pơjuăt, mrô mơnuih čih anăn pơplông gah Khoa học tự nhiên lĕ 323 rơbâo čô hăng mrô mơnuih pơplông gah Khoa học Xã hội truh 566 rơbâo čô. Hrơi tom brơi, Ding jum Pơtô hăng Pơjuăt hơmâo ngă hră mơ-it kơ Khua Jơnum min mơnuih ƀôn sang djop tơring čar, ƀôn prong kơtưn kơ bruă pơgang tơlơi rơnuk rơnua, hơđong kơ tal pơplông abih anih 12 thun 2023 tơdơi kơ hơmâo tơlơi pơhing lăi, arăng ba tơbiă pơrơngiao akŏ tơlơi pơplông Ngữ văn hăng Toán amăng tơlơi pơhing Internet, facebook.