Thun hrăm 2024-2025, tơring čar Dak Lak hmâo 12/53 bôh sang hră gưl 3 kơnuk kơna ngă tui hơdră pơplông đĭ anih 10, đĭ 9 bôh sang hră bơhmu hăng thun hrăm hlâo. Khă mrô sang hră pơphun pơplông đĭ lu, samơ̆ mrô čơđai ngă hră rơkâo pơplông ăt lu mơn. Amăng anun, dlông hloh lĕ Sang hră gưl 3 chuyên Nguyễn Du hmâo rơbêh kơ 1.000 čô čơđai ngă hră nao pơplông, mrô ruah hơnong ñu 1/3.

Kơnong tơlơi hrăm Anglê hmâo mrô mơnuih lu hloh lĕ 1/6. Tal pơplông đĭ anih 10 thun anai, đơ đam tơring čar Dak Lak hmâo rơbêh kơ 7.800 čô čơđai pơplông ƀơi 12 bôh sang hră; pơphun amăng hơdôm hrơi lơ 7 hăng 8/6. Tui kơčăo bruă, bruă čom puang giong kaih hloh lĕ lơ 14/6; lăi pơthâo puang dưi ruah hăng hră čih anăn čơđai đĭ anih 10 amăng lơ 21/6./.