VOV4.Jarai - Năng ai ñu 3 blan dong, ƀing čơđai anih 12 amra pơphun tal pơplông mă ƀăng gưl 3 thun hrăm 2022. Anai lĕ tal pơplông yôm phăn mơng lu čơđai yua kơ bôh tơhnal pơplông anai dưi hmâo lu sang hră đại học mă yua ruah đĭ hrăm gưl dlông. Ră anai, hơdôm bôh sang hră glăk đing nao pơphun pơhrăm brơi, pơtô brơi bôh thâo kơ čơđai sang hră pioh ƀing čơđai prăp lui yak mut tal pơplông mă ƀăng gưl 3, ăt kah hăng gum hrom hơdôm tal pơplông ha jăn mơng hơdôm bôh sang hră đại học pơphun.

Hơdôm hrơi anai, ăt kah hăng lu čơđai sang hră anih 12 pơkon, adơi Nguyễn Đình Dương ƀơi Sang hră gưl 3 Phan Huy Chú, Hà Nội gir run na nao kiăng ngă giong hơdôm tơlơi hrăm amăng mông hrăm ƀơi sang hră tañ hloh, kiăng hmâo mông hrăm glăi bôh thâo, prăp lui kơ tal pơplông mă ƀăng gưl 3 amra pơphun amăng blan 7. Bôh tơhnal mơng tal pơplông mă ƀăng gưl 3 amra yua pioh ruah mut amăng lu bôh sang hră đại học anun Nguyễn Đình Dương gir run hrăm glăi leng kơ hơdôm tơlơi hrăm pioh dưi hmâo bôh tơhnal klă hloh. Ñu ăt rŏng hrăm mă mơn ha jăn hăng hrăm glăi hơdôm tơlơi pơplông hơduah ĕp lăng mơng hơdôm tal pơplông ha jăn yua sa dua bôh sang hră đại học pơphun kiăng kơtưn tơhnal dưi ruah mut amăng hơdôm bôh sang hră đại học:

“Kâo khom hơduah ĕp lu jơlan gah ruah čơđai, hăng lu tơlơi pơkă pha ra, hơdôm tơlơi hrăm pha ra. Samơ̆ hăng kâo, amăng tơlơi hrăm tơnap lĕ ăt amra hmâo anô̆ gal mơn lĕ ƀing gơmơi dưi đĭ tui bôh thâo bơkơtưn mơng sang hră.”

Hăng ƀing čơđai nao pơplông thun anai, bruă hrăm glăi kơ tal pơplông mă ƀăng gưl 3 mơng ƀing čơđai jai tơnap, glêh glar hloh lom 3 thun hrăm gưl 3 khom găn rơgao hrăm ƀu hơđong akă hmâo mơng hlâo, djơ̆ anô̆ ñu ƀơi anăp, đa hrăm lăng nao rai mơng ataih yua kơ klin Covid-19. Yua anun, kiăng dưi pơsit djơ̆ bôh thâo mơng čơđai sang hră, mơng anun hmâo jơlan gah pơhrăm brơi djơ̆ hăng rim čơđai, lu sang hră khom pơphun hơdôm tal pel ĕp glăi bruă hrăm yap wot ƀơi anăp hăng lăng nao rai mơng ataih. Sa dua bôh sang hră đại học dô̆ pơphun tal pơplông ha jăn kiăng ruah čơđai anun hơdôm bôh sang hră phrâo pơphun pơhrăm glăi bôh thâo phun tui tơlơi pơkă mơng tal pơplông gưl 3 kơ čơđai sang hră, laih anun khom pơtô brơi hơdôm mơta tơlơi pơđĭ dlông kiăng djru čơđai sang hră gum hrom hơdôm tal pơplông anai. Yă Huỳnh Thị Hòa Bình, Khua Sang hră gưl 3 Lạng Giang mrô sa, tơring čar Bắc Giang lăi pơhing:

“Thun anai hmâo sa dua bôh sang hră đại học ba tơbiă tal pơplông pơsit bôh thâo, anun rơngiao kơ bruă hrăm glăi pơplông tui hơdôm mơta tơlơi hrăm ƀing čơđai sang hră pơplông ruah mă, ƀing nai pơtô tơlơi hrăm hmâo tơlơi hơduah ĕp lăng hơdôm tơlơi tơña, rơwang bôh thâo pơsit bôh thâo mơng sa dua bôh sang hră, kiăng ba tơbiă bôh yôm pơhrăm glăi kơ čơđai sang hră. Ƀing nai ăt pơsit mơn jơlan gah hăng čơđai kiăng čơđai dưi gum hrom hơdôm tal pơplông, dưi hmâo tơlơi ruah mă klă hloh kơ bruă ƀing čơđai tơdơi kơ pơplông giong nao pơ̆ hơdôm bôh sang hră đại học.”

Ƀơi lu anih anom khom hrăm lăng nao rai mơng ataih sui yua kơ klin Covid-19, hơdôm bôh sang hră khom pel ĕp glăi kơčăo bruă bôh yôm jơlan hơdră hrăm phun, hrơi mông hrăm glăi kiăng hmâo tơlơi pơplih pơkra jơlan hơdră hrăm glăi kơ rim grŭp čơđai sang hră djơ̆ hăng tơlơi sit nik. Hrom hăng jơlan gah pơsir pơphun pel ĕp lăng, pơpha čơđai sang hră kiăng hmâo kơčăo bruă hrăm glăi rơđah kơ rim grŭp čơđai sang hră, sa dua anih anom ăt pok pơhai mơn djru brơi, pơhrăm brơi nai pơtô anih 12 kiăng hrăm glăi kơ čơđai nao pơplông kiăng dưi gum hrom lu tal pơplông. Yă Bùi Thị Kim Tuyến, Khua Gơnong bruă pơtô pơhrăm tơring čar Hoà Bình brơi thâo:

“Pơphun pơhrăm ăt kah hăng pơtô brơi dong kơ ƀing nai pơhrăm brơi čơđai hrăm anih 12, ăt kah hăng pơphun hơdôm grŭp nai pơtô phun djru bôh thâo tơlơi hrăm kơ nai pơtô čơđai ƀơi kual asuek, ataih. Hmâo hơdôm tơlơi pơplih nao rai hăng brơi nai hyu pơtô jăng jai kiăng dưi mơng kual gêh gal truh djru kơ ƀing nai pơtô ƀơi kual asuek, kual ataih kiăng hmâo hơdôm bôh tơhnal klă hloh.”

Dô̆ năng ai ñu 3 blan dong čơđai sang hră anih 12 amra yak mut tal pơplông mă ƀăng gưl 3. Ră anai, Ding jum pơtô pơhrăm hmâo lăi pơthâo akô̆ tơlơi pơplông lông lăng Tal pơplông mă ƀăng gưl 3 thun 2022. Tơlơi lăng tui mơng ƀing nai pơtô, mơng hơdôm bôh sang hră hmâo bôh tŭ yuă prong hăng ƀing čơđai amăng tal pơplông yôm phăn anai./.

            Minh Hường (VOV): Čih – Siu H’ Prăk: Pơblang