VOV4.Jarai-Tlam mơmŏt lơ 21/3, ƀơi Hà Nội, Anom bruă khul tơdăm dra mut phung rơnuk Hồ Chí Minh, anom bruă Khul pơlir hơbit hlăk ai Việt Nam, Khul ơi ia jrao hlăk ai Việt Nam ngă hrom Ding jum ia jrao jơnum pơpŭ bơni kơ 10 čô ơi ia jrao hlăk ai Việt Nam ba gru hlâo amăng bruă mă hăng anăn tơlơi jơnum “Ơi ia jrao hlăk ai amăng tơdron blah pơhlôm pơgang klin kheng covid 19”. Ƀing ơi ia jrao  arăng pơpŭ bơni tal anai lĕ 10 čô ơi ia jrao hlăk ai mă bruă hur har pơjrao tơlơi duăm ruă, pơgang tơlơi suaih pral kơ mơnuih ƀôn sang.

Biă mă ñu amăng bruă mă pơyơr pran jua yua tơlơi suaih pral kơ ană plơi; djru tơlơi khăp pap, pơkă lăng hăng pơjrao duăm ruă kơ mơnuih ƀun rin. Anai lĕ ƀing ơi ia jrao hur har biă mă kơsung nao pơ anăp mă bruă ƀu kơdŭn ôh hăng tơlơi tơnap tap, khin pơyơr pran jua drơi jăn amăng bruă mă, nao truh pơ kual tơnap tap mă bruă djru pơhlôm, pơgang klin covid 19 mơ̆ng thun 2020-2021.

Nay Jek: Pơblang