VOV4.Jarai-Ƀrô djơ̆ tal anai, Khul git gai mơ̆ng dêh čar, jak iâu pơyơr drah ngă hrom Khul ia jrao kyâo bơrơkal mriah dêh čar Việt Nam, Anom bruă djă pioh drah-jur drah mơ̆ng dêh čar jơnum hơdră anăn, pơpŭ bơni kơ 100 čô mơnuih pơyơr drah hur har hloh amăng thun 2022 hăng akŏ ñu “Ha klăk hơtai boh, pơpư̆ hrom sa amăng plĕ, pơyơr drah djru mơnuih”.

Amăng mrô 100 cô mơnuih ba gru hlâo dưi pơpŭ thun anai, hơmâo lu mơnuih pơyơr drah mơ̆ng 60 wơ̆t pơngŏ; hơdôm gru hiam pơyơr drah na nao, pơyơr drah djop mông ječ; laih dơ̆ng hur har jak iâu arăng djru hrom pơyơr drah. Yă Bùi Thị Hòa, Khua Khul ia jrao kyâo bơrơkal mriah Việt Nam, jing anom bruă git gai mơ̆ng dêh čar kơ bruă pơyơr drah lăi: Kah hăng ƀing ling tơhan phun, lu khua mua, mơnuih mă bruă, pơyơr pran jua gah Khul ia jrao kyâo bơrơkal mriah hơmâo pơđĭ tui pran jua, tơlơi pơmin bruă ngă, hơđong kjăp gum hrom anom bruă ia jrao, djop sang bruă kơnuk kơna, khul mơnuih mơnam mut phung jak iâu, pơtô lăi mơnuih ƀôn sang hăng lu mơnuih mơnam ngă hrom bruă pơyơr drah rơnuk rơnua.

Nay Jek: Pơblang