VOV4.Jarai-Rơbêh 30 anom bruă, khul grup mơ̆ng jar kmar hăeng 100 boh sang bruă sĭ mơdrô pơprong mơ̆ng dêh čar tač rơngiao amra nao jơnum hrom pôr pơthâo akŏ bruă hăng pơphun bruă tuh pơ alin kơ kual lŏn dăo ia krông Cửu Long, dưi pơphun amăng lơ 21/6 ƀơi ƀôn prong Cần Thơ. Tơlơi pơhing anai dưi hơmâo Ding jum Akŏ bruă hăng Tuh pơ alin lăi pơthâo hăng ƀing čih tơlơi pơhing phrâo. Jơnum pôr pơthâo akŏ bruă hăng pơphun bruă mă tuh pơ alin kơ kual lŏn dăo ia krông Cửu Long mơ̆ng thun 2021-2030 amra pok pơhai ngă tui Hră pơtrun mrô 13 mơ̆ng Ding jum kơđi čar kơ pơtrut pơđĭ kyar bơwih ƀong huă mơnuih mơnam kual ia krông Cửu Long lăng nao pơ anăp truh thun 2030 hăng thun 2045; tŭ ư pok pơhai akŏ bruă pơkă hnong kual lŏn mơnai ia krông Cửu Long mơ̆ng thun 2021-2030, lăng nao pơ anăp adih thun 2050.

Kơ-iăng khua Ding jum akŏ bruă hăng tuh pơ alin, ơi Trần Quốc Phương brơi thâo: Jơnum anai yôm biă mă amăng bruă tŭ ư hrom mơ̆ng abih bang djop gưl sang bruă, tơlơi gơgrong, anŏ yôm phara mơ̆ng kual lŏn mơnai ia krông Cửu Long dưi pơtruh nao rai hăng anih pơkŏn. Ngă hrom lir hơbit amăng kual jing sa bruă mă git gai ngă tui kiăng pơđĭ kyar đơ đam amăng kual, djop tơring čar amăng kual.

Nay Jek: Pơblang