Tlam lơ 16/7, Kơ-iăng Khua dêh čar ơi Trần Hồng Hà git gai jơnum lăng nao rai mơng ataih hăng ƀơi anăp hăng 22 boh tơring čar, ƀôn prong kiăng hmư̆ hră lăi pơthâo kơ rơkâo pơhrua črăn tơlơi phiăn čih pơkra, pơhrua sa, dua črăn amăng hơdôm tơlơi phiăn amăng bruă ngă hmua hăng ayuh hyiăng lŏn mơnai amăng Jơlan hơdră čih pơkra tơlơi phiăn thun 2025 mơng Khua pơ ala mơnuih ƀôn sang dêh čar tal 15. Črăn tơlơi phiăn čih pơkra glăi, pơhrua sa, dua črăn amăng 16 tơlơi phiăn amăng bruă ngă hmua hăng ayuh hyiăng lŏn mơnai, hơmâo tlâo grup boh tơhnal phun: čih pơkra, pơhrua kiăng dưm dăp anih anom mă bruă, gong gai ƀon lan dua gưl hăng jao bruă, kah gưl; ngă hră pơ-ar amuñ ƀiă, hrŏ ƀiă tơhnal rơkâo tuh pơ alin bơwih ƀong sĭ mơdrô hăng pơsir hĭ mơtăm hơdôm bruă ječ, tơlơi gun găn, anŏ aka ƀu klă phrâo ƀuh mơng tơlơi sit nik.

Pơđut mông mă bruă, Kơ-iăng Khua dêh čar ơi Trần Hồng Hà rơkâo Ding jum ngă hmua hăng ayuh hyiăng lŏn mơnai tŭ mă djop tơlơi pơgôp mơng djop ƀon lan, djop gơnong bruă, ječ ameč pơgiong boh tơhnal črăn tơlơi phiăn. Hrŏm hăng hơdôm boh tơhnal ba nao amăng črăn tơlơi phiăn, Kơ-iăng Khua dêh čar rơkâo prap lui tơlơi pơtrun mơng Kơnuk kơna kiăng pơsir hĭ hơdôm tơlơi tơnap tap, gun găn amăng bruă ngă hmua, ayuh hyiăng lŏn mơnai.