Rơbêh kơ sa rơwang hrơi tơjuh rơgao tơlơi rơdêh container jrom djơ̆ sang mơnuih ƀôn sang ngă 3 čô mơnuih djai, mơnuih ƀôn sang hơdip rôk tui jơlan Hồ Chí Minh ƀơi kual sang čơ 312, să Dak R’la, tơring glông Dak Mil, tơring čar Dak Nông, ăt akă abih mơn bral hngal. Yă Phạm Thị Ngọc Lan – sa čô mơnuih ƀôn sang hơdip amăng kual brơi thâo, črăn jơlan hiam anai ngă lu mơnuih mơgăt rơdêh ƀu kơđiăng, đuăi hmar đơi. Yua kơ anun mơ̆ kơnong amăng hơdôm thun rơgao, ƀơi anai hmâo laih 8 čô mơnuih djai, 6 čô mơnuih rơka ruă yua kơ tơlơi truh ƀơi jơlan glông nao rai.

 “Kâo sĭ mơdrô ƀơi sang čơ sui thun laih, ƀuh kual anai juăt hmâo tơlơi pơjrom kơtang biă. Ră anai kâo čang rơmang khul tơhan wai lăng bruă nao rai ƀơi jơlan glông kơtưn hyu tir pel ĕp wai lăng črăn jơlan huĭ rơhyưt anai; ƀirô apăn bruă wai lăng bruă nao rai khom hmâo bruă ngă rơdêh đuăi rơnang ƀiă, dưm camera pioh bơtơhmal tui tơlơi ngă soh, kiăng pơhlôm klă kơ mơnuih ƀôn sang sĭ mơdrô, dô̆ hơdip mơda ƀơi kơtuai jơlan glông”.

Ơi Lê Văn Hoàng – Khua Jơnum min mơnuih ƀôn sang tơring glông Dak Mil, tơring čar Dak Nông, lăi pơhing, glông jơlan Hồ Chí Minh găn tơring glông hmâo 2 “anih sat” gah tơlơi pơjrom nao rai ƀơi jơlan glông lĕ črăn găn kual krah să Thuận An hăng kual sang čơ 312 să Dak R’la. Hơdôm anih anom anai hmâo tơlơi pơjrom nao rai kơtang biă, ngă djai lu mơnuih hăng răm rai lu rơdêh, răm rai prong gah bruă bơwih ƀong. Gah bruă sut lui hơdôm “anih sat” ƀu pơhlôm bruă rô nao rai anai, ơi Lê Văn Hoàng lăi lĕ pơtrut kơtang lăi pơhing pơđĭ tui tơlơi pơmin mơ̆ng mơnuih rô nao rai ƀơi jơlan glông lĕ akă djop ôh, khom pơplih pơkra glăi jơlan nao rai dong.

 “Tơring glông pơtrut kơtang lăi pơhing, pơđĭ tui tơlơi pơmin mơnuih ƀôn sang ngă tui tơpă bruă nao rai, biă ñu mơnuih mơgăt rơdêh đuăi rơnang ƀiă hăng hơdôm tơlơi pơkă bơdjơ̆ nao pơhlôm ƀơi jơlan nao rai. Khul wai lăng bruă rô nao rai khom kơtưn hyu tir pel ĕp, hmao tlôn thâo hơdôm bruă ngă soh, pơsir tơpă tui tơlơi pơkă. Kiăng pơsir pơđut tơlơi anai, khom tuh pơplai pơkra klă jơlan anao rai. Bơhmutu ñu kah hăng pok prong hơdôm črăn jơlan, dưm truă hơdôm glông jơlan kah pha, khom ngă tui ha amăng plĕ lu jơlan gah pơsir”.

Tơring čar Dak Nông hmâo 3 ară jơlan dêh čar ta găn nao lĕ 14, 14C, 28. Gơnong bruă wai lăng bruă rô nao rai ƀơi jơlan glông ƀơi anai pơsit hơdôm ară jơlan dêh čar hăng sa dua ară jơlan gah tơring čar glăk dô̆ glăi 18 “anih sat” amra hmâo tơlơi truh. Amăng ha mơkrah akô̆ thun anai, ƀơi Dak Nông hmâo 57 mơta tơlơi truh ƀơi jơlan nao rai, ngă djai 43 čô mơnuih, rơka ruă 53 čô mơnuih. Bơhmu hăng thun hlâo, tơlơi truh ƀơi jơlan nao rai hrŏ trun 12 mơta tơlơi, hrŏ trun 2 čô mơnuih djai, samơ̆ đĭ 18 čô mơnuih rơka. Thượng tá Văn Ngọc Lập, Kơ-iăng Khua Anom bruă Tơhan polih wai lăng bruă rô nao rai Kông ang tơring čar Dak Nông brơi thâo, tơlơi truh ƀơi jơlan nao rai hrŏ trun laih samơ̆ hơdôm tơlơi truh kơtang đĭ lu, biă ñu hmâo ƀơi hơdôm “anih sat” gah jơlan nao rai. Kiăng plai ƀiă hmâo tơlơi truh, khul tơhan polih wai lăng ƀơi jơlan nao rai pơtrut kơtang bruă hyu tir wai lăng, pơsir tơpă hơdôm tơlơi ngă soh.

 “Amăng hơdôm hrơi pơ̆ anăp, Anom bruă Tơhan polih ngă tui dong bruă hyu tir hrơi mlăm mơtăm, hăng ngă tui akô̆ bruă pơkă rơnoh đuăi hơdôm bôh rơdêh đuăi nao rai kah hăng rơdêh pơgiăng tuai, cotainer, rơdêh pơgiăng gơnam tam... ƀơi abih bang jơlan, biă ñu ƀơi hơdôm anih amra hmâo tơlơi truh pơjrom nao rai. Hrŏm hăng anun, gum hrŏm na nao hăng kông ang să, khul hyu tir ƀơi jơlan nao rai, lăi pơhing pioh mơnuih ƀôn sang ƀơi kual sang čơ pơđĭ dlông tơlơi pơmin ngă tui djơ̆ tơlơi phiăn nao rai, plai ƀiă hmâo tơlơi truh ƀơi jơlan glông”.

Kiăng pơsir hơdôm “anih sat” ƀu pơhlôm bruă nao rai ƀơi hơdôm ară jơlan dêh čar, jơlan tơring čar, Grŭp pơhlôm ƀơi jơlan nao rai tơring čar Dak Nông hmâo rơkâo laih hơdôm khul apăn bruă wai lăng gum hrŏm hăng hơdôm anih anom pơtrut kơtang lăi pơhing kơ pơđĭ tui tơlơi pơhing ngă tui tơlơi phiăn nao rai ƀơi jơlan glông, ngă tui ha amăng plĕ hơdôm bruă mă, pơsir tơpă hơdôm mơnuih ngă soh hơđong ƀơi jơlan nao rai. Hrŏm hăng anun, pel ĕp, lăng glăi, pơphô brơi rơkâo Jơnum min mơnuih ƀôn sang tơring čar Dak Nông, anom bơwih ƀong wai lăng hơdôm ară jơlan BOT tuh pơplai pơđĭ tui jơlan nao rai, hơkrŭ pơsir hơdôm “anih sat” amra hmâo tơlơi truh ƀơi hơdôm ară jơlan, biă ñu ƀơi Jơlan dêh čar mrô 14 (jơlan Hồ Chí Minh) hăng Jơlan dêh čar mrô 28./.