Blan 11 thun 2021, Sang bruă Khul đah kơmơi mut phung Việt Nam ngă hrŏm Jơnum min Djuai ania pơphun pơtô brơi tong ten, pok pơhai ngă tui hơdră truh pơ 15 boh tơring čar, ƀôn prong hơmâo lu mơnuih djuai ƀiă hăng kual čư̆ siăng. Tui hăng yă Tôn Ngọc Hạnh, Kơ-iăng Khua Khul đah kơmơi mut phung Việt Nam, Kơčăo bruă “Ngă tui bơkơnar rơkơi bơnai hăng pơsir tơlơi ječ ameč hăng đah kơmơi hrơi laih anun čơđai muai” lĕ sa amăng 10 mơta kơčăo bruă, djop črăn amăng hơdră bruă tơhnal pơkă mơ̆ng dêh čar pơđĭ kyar bơwih ƀong huă mơnuih mơnam kual djuai ƀiă hăng čư̆ siăng mơ̆ng thun 2021-2030. Kơčăo bruă anai yua Khul đah kơmơi mut phung Việt Nam dưi jao pơphun dăp hơdră hăng pok pơhai ngă tui. Anai ăt jing tal blung a amăng hơdră tơhnal pơkă mơ̆ng dêh čar pơđĭ kyar bơwih ƀong huă mơnuih mơnam kual djuai ƀiă hăng čư̆ siăng hơmâo kơčăo bruă phara hơjăn sa kơčăo bruă amăng črăn pơtrut ngă bơkơnar đah rơkơi hăng đah kơmơi.

Anom bruă Khul đah kơmơi mut phung dêh čar pok pơhai lu bruă mă pôr tơlơi pơhing kơ kơčăo bruă 8 kơnang kơ lu hơdră hyu pôr pơthâo, jơnum bơkơtuai nao rai amăng glông bruă tơlơi pơhing. Ngă hrŏm djop ding jum, anom bruă pơdjơ̆ nao, ngă tui hơdôm boh yom phun, tơhnal pơkă mơ̆ng kơčăo bruă 8 pơdjơ̆ nao tơlơi dưi, bruă mă mơ̆ng ƀing gơñu.

Hrŏm hăng lu bruă mă djru mơ̆ng Khul đah kơmơi mut phung dêh čar, Khul đah kơmơi mut phung djop gưl ƀơi tơring čar ăt pơtum bruă mă, mơnuih apăn bruă, tơlơi gêh găl pioh pok pơhai hơdôm bruă mă ƀơi 8 boh să ngă hlâo, akŏ pơjing hăng djă ngă tui na nao 32 hơbô̆ bruă hơmâo grup hyu pơtô lăi amăng plơi pla, 4 anih lăp đăo kơnang, 4 khul khua apăn bruă ba jơlan hlâo mơ̆ng bruă pơblih phrâo hăng pơphun brơi bruă mă 4 wơ̆t bưp bơkơtuai nao raikơ jơlan hơdră kơnuk kơna djru. Đing nao, pơphun bruă mă pơtô hrăm pơđĭ tơlơi thâo kơ mơnuih apăn bruă ƀing đah kơmơi djuai ƀiă. Pơtô hrăm, pơčrâo ba, krăo lăng, pơtong glăi bruă ngă bơkơnar rơkơi bơnai, pơđĭ tui tơlơi thâo ngă hrŏm lu bruă mă kơ mơnuih apăn bruă ƀơi tơring glông, să hăng plơi pla.

Tui hăng yă Trần Lan Phương Kơ-iăng Khua Khul đah kơmơi mut phung Việt Nam, tơdơi kơ 3 thun pok pơhai lu bruă mă pôr pơthâo tơlơi pơhing, pơđĭtui tơlơi thâo kơ ƀing khua mua apăn bruă đah kơmơi djuai ƀiă, pơtrut ngă hrŏm lu hơdră pơtlep hrŏm djru ba ƀing đah kơmơi hăng đah rơkơi mă bruă amăng glông bruă kơđi čar, ƀing tha plơi, khua ƀôn, mơnuih arăng đăo kơnang amăng plơi pla hăng pơphun jơnum bưp nao rai hăng khua mua amăng plơi pla hrŏm khua mua amăng să dưi hơmâo djop khul, bruă hăng sang bruă khul đah kơmơi mut phung djop tơring čar anun dăp brơi pok pơhai ngă tui sa hơnơ̆ng, djru ba ƀơi să ngă hlâo.

“Djop bruă mă git gai pơčrâo ba ngă hlâo hơmâo pơjing rai bruă mă klă amăng tơlơi thâo hluh, bruă ngă mơ̆ng mơnuih ƀôn sang, djru hrŏm ngă pơblih tơlơi pơmin, hơdră ngă bruă, lui hĭ tơlơi kah pơpha rơkơi bơnai hăng pơhrŏ hĭ tơlơi bơbeč djơ̆ mơ̆ng djop bruă mă amăng mơnuih mơnam brơi ngă tui ječ ameč hăng đah kơmơi laih anun čơđai muai”.

Yă Lò Thị Thu Thủy, ding kơna khul git gai, Khua anom bruă djuai ania-Tơlơi đăo gah sang bruă Khua khul đah kơmơi mut phung Việt Nam brơi thâo: djop anom bruă ƀơi gơnong dlông khul đah kơmơi mut phung hơmâo čih pơkra lu mơta hră pơar pơtô ba akŏ pơjing, pơčrâo bruă hăng ba hră pơar tơlơi pơhing pơtô pơblang brơi kơ ƀing hyu mă bruă pơtô lăi, pơphun bruă mă mơ̆ng hơdôm hơbô̆ bruă pok pơhai ngă tui. Boh nik ñu hơbô̆ bruă khul “Khua apăn akŏ mơ̆ng anŏ pơblih phrâo”, pơdah thâo rup tơlơi pơhing ngă video, rup djă pioh pơblang sit nik amăng bruă mă kiăng thâo rơđah, gêh găl kơ rim mơnuih dŏ hmư̆ tơlơi pơtô.

“Kơnang kơ bruă mă pơtô hrăm pơđĭ tui tơlơi thâo kơ ƀing khua mua amăng khul hăng ƀing apăn bruă djop anom bruă ƀơi să brơi akŏ pơjing, pơphun bruă mă hăng pơđĭ boh tŭ yua amăng bruă mă tui hơbô̆ bruă dưi hơmâo Khul khua mua apăn bruă đah kơmơi mut phung đing nao brơi ngă tui re se rim thun. Laih dơ̆ng  kơtưn bruă djru boh thâo ia rơgơi ƀơi tơring čar git gai wai lăng, pơphun brơi bruă mă. Pơphun lu bruă mă jơnum pơtô lăi, pôr tơlơi pơhing ngă tui bơhmutu ƀơi kual plơi pla mơtam”.

Tui hăng hră lăi pơthâo mơ̆ng Khua wai lăng  gah djuai ania-Tơlơi đăo, mơ̆ng Sang bruă khua khul đah kơmơimut phung Việt Nam, djop bruă mă mơ̆ng khul pơphun ƀơi să ngă hlâo, pơtum nao amăng bruă jơnum ngui ngor bơ ră ruai ƀơi anăp mơta, pioh pôr brơi tơlơi pơhing ngă gru tơlơi pơhmutu kiăng pơblih tơlơi pơmin hơđăp, hơdră mă bruă mơ̆ng đưm, lui hĭ tơlơi pơmin kah pơpha rơkơi bơnai ngă dŏ khăng khŏp. Kiăo tui tơlơi pơtô ba mơ̆ng Gơnong dlông, djop gưl amăng khul đah kơmơi mut phung, hơmâo pơtum nao amăng bruă mă kơ djop anom bruă, djop gưl pok pơhai lu bruă mă ba glăi boh tơhnal  tŭ yua sit nik.