VOV4.Jarai - Bruă pok pơhai Pơsur “Mơnuih Việt Nam đing nao yua gơnam Việt Nam” hơdôm hrơi rơgao hmâo ba glăi laih bôh tơhnal sit nik, kah hăng pơdŏng hơdôm jơlan pơlir hơbit ngă rai gơnam tam, sĭ blơi gơnam Việt Nam kơjăp phik; đĭ mrô gơnam Việt Nam hmâo anô̆ gal ƀơi glông pơpha hyu sĭ... Mơng anun djru mơnuih blơi yua gơnam ngă juăt lu hloh hăng gơnam klă hiam.

Ngă tui pok pơhai Bruă pơsur “Mơnuih Việt Nam đing nao blơi yua gơnam Việt Nam”, hơdôm hrơi rơgao lu anom bơwih ƀong amăng dêh čar ta hmâo pok pơhai lu jơlan pơsur pơhư prong bruă ngă rai gơnam, sĭ blơi gơnam amăng lŏn ia; đĭ mrô gơnam amăng lŏn ia, lăi pơhư̆č, lăi pơthâo gơnam tam, anăn gơnam; pok prong anih anom sĭ mơdrô, biă ñu hơdôm kual plơi pla, kual asuek, ataih. Mơng anun pơdah klă bruă mă yôm phăn mơng pô amăng bruă pơhlôm mrô gơnam tam, bruă sĭ blơi gơnam phun: kah hăng braih pơdai, gơnam ƀong huă...

Tui hăng tơlơi pơsit mơng lu mơnuih blơi yua gơnam, ră anai gơnam Việt Nam glăk jai hrơi jai dưi ruah mă lu yua kơ nua gơnam lăp djơ̆ prăk hmâo mơng hơdôm gưl amăng mơnuih mơnam. Hrom hăng anun anô̆ klă, anăn păn gơnam jai hrơi jai dưi pơđĭ tui, lu mơta gah djuai... djop mơta gơnam dưi hmâo lu mơnuih ruah hloh lĕ: Gơnam mă mơng đang hmua, băn ao, gơnam blơi yua pơkon. Ơi Chu Quang Hào, Khua Phun akha Sang bruă Dăng kông Việt Nam brơi thâo, mơng thun 2019 Phun akha Sang bruă hmâo tuh pơplai hăng pok pơhai gơnam sĭ mơdrô điện tử Postmart.vn kiăng pơtrut kơtang bruă blơi sĭ gơnam hăng hơdôm gơnam amăng lŏn ia ta pơkra. Kơnong kơ thun hlâo, abih bang gơnam blơi sĭ hmâo laih 120 klai prăk, hmâo rơbêh kơ 100 rơbâo tơn gơnam mă mơng đang hmua bơyan mơyan kơ neh wa ƀơi lu tơring čar, ƀôn prong amăng đơ đam dêh čar ta kah hăng: Bắc Giang, Lào Cai, Bến Tre... hrom hăng lu anih anom, ba glăi lu bôh tơhnal klă amăng bruă sĭ gơnam kơ neh wa ngă đang hmua hăng lu anom bơwih ƀong sĭ mơdrô amăng đơ đam dêh čar:

Anun lĕ hơdôm gru nam blung a, yôm phăn mơng bruă blơi sĭ gơnam điện tử mơng Postmart gah Sang dăng kông Việt Nam hmâo ngă laih amăng 2 thun rơgao lom klin gluh đĭ. Ră anai hăng bruă mă dưi hmâo Kơnuk kơna, hơdôm Ding jum wai lăng tơlơi pơhing hăng pôr pơhing jao anun lĕ pơdŏng hăng pok pơhai bruă blơi sĭ điện tử mơng Postmart jing bruă blơi sĭ gơnam Việt, kiăng ba abih bang gơnam mă mơng đang hmua kual ăt kah hăng hơdôm gơnam mơng Made in Việt Nam mut amăng anih sĭ mơdrô điện tử.

Tui hăng Kơ-iăng Khua Ding jum sĭ mơdrô Đỗ Thắng Hải, ră anai mrô gơnam Việt Nam ƀơi hơdôm bôh siêu thị, Anom sĭ mơdrô prong hmâo đĭ truh mơng 80-90%, kơnong mrô gơnam Việt ƀơi hơdôm bôh siêu thị Go mơng Grŭp Central Retail hmâo đĭ truh laih mơng 94-96%; ƀơi Sang čơ hơđăp hmâo mơng 60-70%... Tui anun, Bruă pơsur rơđah rơđông hmâo ba glăi laih bôh tơhnal prong prin biă. Kơ-iăng Khua Ding jum ơi Đỗ Thắng Hải ăt brơi thâo mơn, kiăng pok pơhai ngă tui dong bruă pơsur amăng rơwang pơ̆ anap, Ding jum sĭ mơdrô dêh čar hmâo pơdŏng hăng dưi hmâo Khua dêh čar pơsit Akô̆ bruă pơđĭ kyar anih anom sĭ mơdrô amăng lŏn ia pơkĕ hrom hăng bruă pơsur mơnuih Việt Nam đing nao blơi yua gơnam Việt Nam rơwang mơng thun 2021-2025. Akô̆ bruă hmâo bôh tŭ yua klă amăng bruă pơhlôm tơlơi hơdip mơnuih ƀôn sang, djă pioh pơđĭ kyar bơwih ƀong – mơnuih mơnam hơđong ƀơi anăp glăk hmâo lu tơlơi pơplih gah ƀu hơđong bruă bơwih ƀong ƀơi rŏng lŏn tơnah; tơlơi lông mơng mut hrom hăng bơbeč mơng klin ruă Covid-19...

Amăng Akô̆ bruă anai anăp nao tơhnal pơkă kiăng djru pơđĭ kyar anih anom sĭ mơdrô amăng lŏn ia, pơphun ba glăi bôh tơhnal bruă pơpha hyu gơnam sĭ. Mơng anun pơdŏng hơdôm bruă pơlir hơbit gơnam sĭ mơdrô hluh gah, pơjing tơlơi pơkĕ hrom kơjăp kơplah wah hơdôm pô amăng anih anom sĭ mơdrô mơng mơnuih pơkra gơnam truh mơnuih blơi yua mơng Kơnuk kơna truh plơi pla mơng anom bơwih ƀong sĭ mơdrô hăng truh hơdôm bôh ƀirô wai lăng kơnuk kơna kiăng ba gơnam tam klă hiam mơng lu kual pha ra truh tơl tơngan mơnuih blơi yua ƀơi plơi pla hăng ngă pơhư̆č gơnam mă mơng đang hmua pha ra ƀơi plơi pla truh hơdôm tơring čar, ƀôn prong.

Kiăng pơtrut kơtang Bruă pơsur “Mơnuih Việt Nam đing nao blơi yua gơnam Việt Nam” ăt kah hăng kiăng gơnam Việt jai hrơi jai dưi hmâo mơnuih blơi yua đing nao blơi yua lu gơnam amăng dêh čar pô hloh, hơdôm bôh anom bơwih ƀong khom pơtrut kơtang bruă pơanăn gơnam, pơplih phrâo, pơčeh pơhrâo tuh pơplai măi mok phrâo rơnuk anai kiăng hrŏ trun nua gơnam, pơđĭ bôh thâo bơkơtưn. Pơtrut bruă pok prong tơlơi rô nao rai anom bơwih ƀong, pơlir hơbit, pơkĕ hrom pơdŏng gum hrom amăng hơdôm pơlir hơbit ... kiăng gơnam ngă rai, bruă sĭ blơi jai tâ̆o klă hloh./.

Nguyễn Hằng (VOV1): Čih – Siu H’ Prăk: Pơblang