Pok pơhai tơlơi pơkôl gum hrŏm pơđĭ kyar bơwih ƀong – mơnuih mơnam kơplah wah hơdôm bôh tơring čar kual Dap Kơdư hăng ƀôn prong Hồ Chí Minh, lơ 29/11, ƀơi plơi prong Kon Tum, Jơnum min mơnuih ƀôn sang tơring čar Kon Tum hăng grŭp wai lăng kual sang măi mă yua măi mok yôm ƀôn prong Hồ Chí Minh gum hrŏm pơphun Bơkơtuai bôh thâo phrâo “Pơplih mrô amăng ngă đang hmua, tơhnal tô nao rai hơdră mă yua măi mok kơplah wah Dap Kơdư hăng ƀôn prong Hồ Chí Minh”. Bơkơtuai hmâo tơlơi gum hrŏm mơ̆ng 150 čô khua pơ ala.

Tơlơi pơhing amăng mông bơkơtuai, pơplih mrô amăng bruă đang hmua ƀơi Dap Kơdư ăt jing sa bruă mă phrâo hnuă, bŏng glăi hăng lu tơlơi lông biă ñu anom mă yua măi mok hăng tơlơi ngă juăt hăng hơdră phrâo mơ̆ng mơnuih ngă đang hmua. Bruă pok pơhai pơplih mrô amra ba glăi hơdôm tơlơi pơplih phrâo, djru hơdôm bôh tơring čar kual Dap Kơdư ƀu kơnong kơ pơđĭ kyar kơtang ôh mơ̆ ñŭ dô̆ pơđĭ kyar kơjăp phik hloh dong. Ƀing wai lăng, juăt bruă, mơnuih kơsem min, anom bơwih ƀong hăng rim mơnuih hmâo gum hrŏm bơkơtuai, ba tơbiă jơlan djru pơtrut pơplih mrô amăng ngă đang hmua ƀơi kual; pơtrut kơtang mă yua bôh thâo phrâo măi mok hăng ngă đang hmua; kơtưn tơhnal gum hrŏm, tô nao rai anih anom sĭ mơdrô bôh thâo hăng hơdră yua măi mok, gơnam ngă rai kơplah wah hơdôm bôh tơring čar kual Dap Kơdư hăng ƀôn prong Hồ Chí Minh. 9 tơlơi čih gum lăi pơthâo pơdah ƀơi anăp, 24 tơlơi čih gum lăi mơ-ĭt kơ mông bơkơtuai mơ̆ng mơnuih wai lăng, juăt bruă, mơnuih kơsem min, anom bơwih ƀong hăng rim mơnuih ăt hmâo pơblang rơđah mơn tơlơi pơplih mrô bruă đang hmua hơdôm bôh tơring čar amăng kual Dap Kơdư; pok tơbiă hơdôm tơlơi kiăng gum hrŏm pơtrut pơplih mrô hăng pơđĭ kyar bruă đang hmua kơjăp kơplah wah hơdôm bôh tơring čar amăng kual Dap Kơdư hăng ƀôn prong Hồ Chí Minh; lăi pơthâo hơdôm anăn mă yua amăng măi phrâo gah bruă đang hmua./.