Tui lăi pơthâo, 6 blan rơgao, Ping gah khul bơwih ƀong sĭ mơdrô hơmâo đing nao git gai djop gưl Ping gah git gai bruă bơwih ƀong sĭ mơdrô pơtrut tañ pơplih phrâo mơng Ping gah hăng hrưn đĭ tŭ yua amăng bruă bơwih ƀong sĭ mơdrô mơng kơnuk kơna tui hơdôm tơlơi črâo ba, tơlơi pơtrun mơng Ping gah hăng hơdră bruă, tơlơi phiăn mơng Kơnuk kơna. Sit biă ñu, hăng hơnong pơkă gir run pơgiong tañ hơnong pơkă tui tơlơi pơtrun mơng Jơnum Ping gah djop gưl rơwang thun 2020-2025, hơdôm hơnong pơkă bơwih ƀong sĭ mơdrô amăng Khul dưi ngă rơbêh 50% tui tơlơi pơkă amăng thun hăng đĭ ƀiă pơhmu tui tơđar thun hlâo.

Đĭ pơhiăp pơphun tal pơplông pơ anăp anai, Khua git gai Ping gah Khul anom bơwih ƀong sĭ mơdrô gơnong glông ơi Nguyễn Thanh Long rơkâo đing nao pok pơhai hơdôm jơlan hơdră pel ĕp, krăo lăng thun 2024, pơsir hĭ hơdôm hră pơ-ar dŏ glăi, kiăng pơsir hĭ hơdôm bruă gun găn prap yak nao thun tơdơi jơnum dưi pơphun gêh gal; đing nao pơtrut kơtang ngă tui akŏ bruă pơplih amăng bơwih ƀong sĭ mơdrô, git gai pok pơhai hơdôm akŏ bruă yôm phun.