VOV4.Jarai - Ha wŏt hrơi tơjuh tơdơi kơ mông jơnum tal 1, mơnuih ƀon sang dêh čar Prang lơ 19/6, hơmâo nao plĕ hră rơwang tal 2 dong kiăng kơ ruah 577 čô Khua pơ ala mơnuih ƀon sang dêh čar Prang phrâo. Amăng rơwang tal 2 anai, ƀing tơbiă anăn mơng khul bơkơđai glăi hăng ƀing tơbiă anăn mơng Khul “Gum tơngan hrŏm” amra bơkơtưn ƀơi anăp mơtăm ƀơi 278 anih plĕ hră hăng mrô hră plĕ amra pơsit bơnah hơpă hơmâo lu hră dong yua hloh.

Tui hăng mrô jŭ yap yua hơdôm anom bruă hơduah ĕp amăng mơnuih mơnam ƀơi Prang brơi ƀuh, mrô mơnuih ƀon sang dêh čar Prang kut nao plĕ hră amăng rơwang tal 2 amra lu tui, mơng 53 truh pơ 56%. Tui sem lăng mơng hơdôm tal hơduah ĕp amăng mơnuih mơnam, mah bơkơnar ƀudah aset ƀiă khul bơkơđai glăi kơ mrô hră plĕ samơ̆ Khul “gum tơngan hrŏm” mơng ơi Macron him lăng amra hơmâo lu grê hloh amăng Ƀrô Khua pơ ala mơnuih ƀon sang dêh čar Prang, him lăng mơng 265 truh pơ 305 boh grê.

Siu Đoan: Pơblan