VOV4.Jarai-Tơdơi kơ ĕp lăng kiăng thâo tong ten tơlơi truh lŏn pơpư̆ ƀơi tơring glông Kon Plong, mơguah ơ 21/4, Grup hyu mă”bruă mơ̆ng dêh čar git gai pơhlôm, pơgang tơlơi truh lŏn adai ngă, hơmâo mă bruă hăng khua mua git gai pơgang tơlơi truh lŏn adai ngă tơring čar Kon Tum. Tui hăng tơlơi lăi pơthâo, mah aka ƀu hơmâo tơlơi răm ƀăm ôh, samơ̆ lŏn pơpư̆, ngă tơpư̆ kơtang phrâo anai ngă kơ lu mơnuih bơngơ̆t bral hơngal.

Grup hyu mă bruă nao mă bruă hăng khua mua pơgang tơlơi truh lŏn adai ngă ƀơi Kon Tum

Hmư̆ tơlơi lăi pơthâo mơ̆ng khua mua tơring glông Kon Plong, tơring čar Kon Tum, khua mua pơ ala djop ding jum, anom bruă gơnong dlông ăt kah hăng ƀing mơnuih rơgơi kơhnâo bruă pơhlôm, pơgang tơlơi truh lŏn adai ngă dêh čar lăi, ƀơi anăp lĕ khom sem lăng, hơduah ĕp anŏ hơgĕt bơbeč djơ̆ truh lŏn pơpư̆ amăng tơring glông. Kiăng pơtô lăi mơnuih ƀôn sang, gong gai kơnuk kơna prăp lui djru mơnuih ƀôn sang sit hơmâo tơlơi rung răng lŏn pơpư̆ čư̆ mơgơi, kiăng hơmâo hơdră bĕ hmao kru.

Nay Jek: Pơblang