VOV4.Jarai - Mơng Bình Dương adih glăi ƀong tê̆t hrŏm sang anŏ, amai Y Ngọc, sang ñu pơ plơi Dăk Rơ Đe, să Ngọc Bay, plơi prong Kon Tum, tơring čar Kon Tum djă ba lu tơlơi mơ-ak amăng pran jua ñu. Djru amĭ hăng adơi ayong prăp lui hla, hrĕ akă či anung ƀañ rah, ƀrô pơdah tơlơi mơ-ak mơng ñu rah. Tui hăng ñu, tơlơi mơ-ak hloh lĕ hiam drơi jăn, rơnuk rơnua hĭ mơn amăng mông hơmâo klin Covid-19. Tơlơi ngă ñu mơ-ak hloh dong lĕ ngă kông ñơn pơ Bình Dương hơmâo prăk blan hơđong mơng 9 truh 12 klăk, ƀong huă rim hrơi yua kông ti djru brơi, yua hnun ñu hơmâo prăk pơkom lui glăi djru amĭ ñu. Tơlơi ñu tlao hok prong hloh dong lĕ Tê̆t thun anai Y Ngọc jak ba pô khăp ñu anăn A Ngen, pô ngă hrŏm Kông ti ñu glăi pơƀuh kơ sang anŏ, pơmin pơdô̆ amăng thun phrâo anai hlao. Mơ-ak hrŏm hrơi čơkă Tê̆t mơng sang anŏ hăng ană plơi ƀơi Đăk Rơ Đe, Amai Y Ngọc brơi thâo:

“Tơdah gir ngă sui ƀơi kông ti lĕ prăk blah kâo amra lu tui mơn, ƀong huă hơmâo kông ti yơh lo brơi. Nao mă bruă ha hrơi, mơmot tơdah mă thim lĕ ăt hơmâo prăk mơn. Thun rơgao, kâo hơmâo pơkom prăk mơn, hơmâo prăk blơi gơnam ngui Tê̆t čơkă thun phrâo. Tơdơi hrơi tê̆t kâo nao mă bruă dong mơn, tơdah klin dŏ kơtang lĕ kâo ĕp bruă amăng tơring čar gơmơi, tŭ ư hơmâo bruă mă, hơmâo prăk”.

Hăng neh met wa djuai ania Êđê ƀơi tơring glông Krông Ana, tơring čar Dak Lăk, pre lui kơ hrơi ƀong tê̆t jing bruă juăt ngă laih, yua dah hlơi hlơi lêng kơ čang rơmang thun phrâo hơmâo tơlơi yâo mơ-ak. Yă H’Ñê Niê, dŏ ƀơi Ƀuôn Kla, să Dray Sap, tơring glông Krông Ana, tơring čar Dak Lăk ră ruai:

“Đưm hlâo, lơ̆m truh blan 2 arăng juăt ngă yang kơbao, rơmô, amăng hrơi ngui ngor tui anun arăng čơkă tuai mơng anai mơng adih rai ngui. Rơnuk anai lơ̆m truh hrơi tê̆t, gơmơi ăt prăp lui gơnam ƀong huă mơn, kih rơmet sang anŏ agaih hiam pre či čơkă tuai rai čuă jơmư sang anŏ amăng akŏ thun phrâo. Amăng thun phrâo kâo kiăng hiam drơi jăn pran jua, nao čuă ană bă, ană tơčô, gum ngui tom bruă jơnum ngui amăng plơi pla dong”.

Amăng hrơi tê̆t truh, jing sa čô hlăk ai, ayong Hyim ƀơi plơi Kon Brung, să A Yun, tơring glông Mang Yang, tơring čar Gia Lai čang rơmang hrơi ngui ngor mơ-ak. Tui anun, ayong Hyim pre lui prăk blơi sum ao phrâo kơ sang anŏ, blơi ƀañ kĕo, gơnam ƀong huă hăng bơnga pơhrup sang anŏ amăng hrơi tê̆t.

“Čơkă tê̆t ta ăt prăp lui mơn gơnam yua. Laih dong amăng hrơi thun phrâo lĕ sang anŏ ăt bơblăi nao rai hơdră jik bruă ngă hmua, ngă hiư̆m đah mơng hơmâo prăk kăk, blơi sum ao brơi ană bă, gơnam tam kơ sang anŏ kah hăng gơnam ƀong, ia mơñum, mơnong akan....kiăng hrơi Tê̆t mơ-ak hloh”.

Prăp lui tê̆t kơ sang anŏ pô, samơ̆ ăt prăp lui mơn kơ mơnuih tơpuôl. Anun jing tơlơi pơmin mơng ƀing pla añăm ƀơi tơring glông Đơn Dương, tơring čar Lâm Đồng. Bơyan tê̆t thun anai, añăm pơmă, ba sĭ djŏp kơ anih sĭ mơdrô, yua hnun sang anŏ hlơi hlơi lêng hơmâo soh yơh prăk blơi gơnam yua čơkă thun phrâo. Ơi K’Điếp, dŏ ƀơi să Lạc Lâm, tơring glông Đơn Dương, tơring čar Lâm Đồng lăi:

“Sang anŏ gơmơi pla añăm sĭ mơdrô tui boh thâo phrâo pla ƀơi sang mơnil, sang klum jal, sĭ kơ arăng plơi amăng hrơi tê̆t. kiăng bruă ngă añăm klă, hơdjă, kâo kiăo tui mông jơnum, hla tui ƀing apăn bruă pơtô ba, mơng anun kâo thâo pla añăm ta pruai kmơk hơget mơng djơ̆, mơng klă. Yua hnun mơn, đang añăm sang anŏ gơmơi hiam biă, sĭ pơmă mơn, hơmâo arăng amuaih blơi, jing hơmâo prăk amăng hrơi tê̆t”.

Siu H’Mai: Pơblang