VOV4.Jarai - Ƀrô djơ̆ tal Hrơi jar kơmar pioh kơ Đah kơmơi lơ 8/3, čơtlăm lơ 4/3, nao čuă hăng hơ-ư̆č hmưi Khul pơplir hơbit đah kơmơi Việt Nam, Ding kơna Ding jum kơđi čar, Kơ-iăng Khua git gai wai lăng pơ ala mơnuih ƀôn sang dêh čar ta ơi Trần Thanh Mẫn rơkâo prăp lui klă kiăng pơphun truh kih Jơnum khua pơ ala đah kơmơi đơ đam dêh čar tal 13 pơ̆ anăp. Pơ ala kơ Khua git gai Ping gah, Kơnuk kơna, Khua pơ ala mơnuih ƀôn sang, ơi Trần Thanh Mẫn mơ-ĭt tơlơi hơ-ư̆č hmưi klă hiam hloh truh hăng Khul Đah kơmơi pơlir hơbit Việt Nam ăt kah hăng abih bang adơi amai amăng đơ đam dêh čar suaih pral na nao, yâu mơ-ak hăng truh kih djop bruă. Hăng anăn ñu “Dưm kơnar hrơi anai yua kơ sa hrơi pơgi kơdih anai kơjăp” mơng hrơi Jar kơmar đah kơmơi lơ 8/3 thun anai, ơi Trần Thanh Mẫn lăi rơđah, khua git gai Ping gah, Kơnuk kơna, Gong gai dêh čar, Khua pơ ala mơnuih ƀôn sang amra ngă gal brơi dong kiăng đah kơmơi apăn bruă, mơnuih mă bruă čar, djop adơi amai mă djop mơta bruă amăng khul mut phung ngă tui pran pô thâo, dưi pơsit bôh thâo, tơlơi đăo gơnang mơng drơi pô, dưi hmâo lu bôh than prong, djru lu hloh dong kơ bruă pơplih phrâo lŏn ia pơ̆ anăp anai./.

Siu H’ Prăk: Pơblang