VOV4.Jarai - Lơ 12/5, Gơnong bruă mă, tơhan rơka hăng mơnuih mơnam gum hrŏm hăng Khul hlăk ai tơring čar Kon Tum pơphun “Hrơi bruă mă thun 2022” brơi mơnuih mă bruă ƀơi ƀon lan. Hơmâo laih rơbêh 750 čô mơnuih mă bruă, čơđai hrăm hră, ƀô̆ đô̆i ƀiă abih thun ngă tơhan, ƀing hlăk anai mut hrŏm. Amăng mrô anai hơmâo 570 čô mơnuih mă bruă hơmâo hơdôm anom bruă črâo brơi, ĕp brơi bruă mă hăng mrô mơnuih hơmâo bruă mă giăm 20%.

Lăi pơthâo brơi bruă mă brơi mơnuih mă bruă amăng hrơi bruă mă

Ăt amăng hrơi anai mơn, Khul pơphun ăt ba nao giăm 60 čô mơnuih mă bruă pơ tơring čar Bình Dương. Laih dong, hơmâo 8 čô mơnuih mă bruă dưi nao mă bruă pơ Đài Loan. Amăng Hrơi bruă mă, hơmâo laih 49 boh anom bơwih ƀong sĭ mơdrô, anom bruă kiăng rơbêh 5.200 čô mơnuih mă bruă amăng tơring čar, gah rơngiao tơring čar hăng mă bruă pơ tač rơngiao tui hră pơkôl pơkă. Hrŏm hăng anun, dua boh sang hră Cao Đẳng, sang hră pơtô hrăm kiăng pơtô brơi bruă mă amăng thun 2022-2023 hăng rơbêh 3.000 čô mơnuih.

Siu Đoan: Pơblang