Tơdơi kơ 2 thun mơtăm ƀuh hrŏ trun rơdêh pơjrŏm, amăng 5 blan akŏ thun 2024 bruă wai lăng amăng jơlan glông ƀơi tơring čar Dak Nông bưp tơnap tap, hăng 57 wŏt ƀuh rơdêh pơjrŏm ngă 37 čô mơnuih djai, 38 čô mơnuih rơka rơkač. Pơhmu tui tơđar thun 2023, rơdêh pơjrŏm ƀơi tơring čar Dak Nông ƀuh lu tui, wŏt mơnuih djai hăng rơka. Ba truh tơlơi anai lĕ yua mơnuih đuăi rơdêh amăng jơlan glông ƀu răng kơđiăng ngă tui djơ̆ tơlơi phiăn, bruă pơsir hĭ anŏ aka ƀu klă rôk jơlan amăng ƀon lan aka ƀu pơhlôm hmao tlôn.

Kơ hơdôm hơdră pơhlôm rơnuk rơnua amăng jơlan glông pơ anăp anai, thượng tá Phạm Quốc Lập, Khua anom bruă tơhan pôlih wai lăng jơlan glông-Kông ang tơring čar brơi thâo, anom bruă hơmâo gơgrong pel ĕp, rơkâo gong gai ƀon lan hăng hơdôm gơnong bruă bơdjơ̆ nao gum hrŏm, kơtưn amăng pơtô pơblang tơlơi phiăn, kơtưn amăng bruă hyu tir pel ĕp bruă ngă soh lơm đuăi rơdêh amăng jơlan glông, pơphun jơlan hơdră abih bang mơnuih gum hrŏm lăi pơthâo hơdôm bruă ngă soh lơm đuăi rơdêh amăng jơlan glông.