VOV4.Jarai-Tlam lơ 24/1, Ding jum Gru grua Pơrơguăt drơi jăn hăng Tuai čuă ngui, jơnum bơkơtuai tŭ ư hơdră ngă tui, pok glăi bah amăng čơkă tuai jar kmar rai ngui amăng dêh čar ta, tui hơdră jơnum bưp ƀô̆ mơta ƀơi anăp hăng lăng nao rai amăng tivi mơ̆ng 20 bit anih ƀơi djop tơring čar, ƀôn prong lơ̆m dêh čar. Ƀơi mông jơnum anai, Ding jum Gru grua Pơrơguăt drơi jăn hăng Tuai čuă ngui rơkâo pok bah amăng čơkă tuai mơ̆ng lơ 1/5 pơ anăp.

Yap truh lơ 23/1/2022, Việt Nam hơmâo čơkă laih 8500 wơ̆t tuai mơ̆ng jar kmar, nao ngui pơ 3 boh tơring čar kah hăng pơ: Phú Quốc tơring čar Kiên Giang, tơring čar Khánh Hòa hăng Quảng Nam. Truh ră anai, mrô tuai hăng mơnuih ngă bruă sĭ mơdrô jar kmar, anih anom brơi apah sang jưh tuai čih anăn pơgiăng tuai hăng čơkă tuai jar kmar, jai hrơi lu.

 Ƀơi anăp boh tơhnal klă hiam anun, tuai jar kmar amra rai pơ dêh čar ta, jơnum anai tŭ ư tui hơdră pok tui ƀơƀrư̆ anih tuai čuă ngui, lu khua mua, mơnuih kơhnâo kơhnăk tŭ ư brơi Việt Nam pơtrut tañ bruă pok glăi bah amăng kơ tuai jar kmar rai ngui.

Nay Jek: Pơblang