VOV4.Jarai - Jơlan hơdră “Bruă rông rơmô” yua Khul kyâo bơrơkal mriah ƀơi ƀôn prong Buôn Ma Thuột, tơring čar Dak Lak pok pơhai hơdôm thun laih rơgao ba glăi tŭ yua sit nik lơ̆m pơgôp prong djru brơi lu sang anŏ dưi pơklaih mơng ƀun rin.

Thun 2017, amai H’Râu H’Đơk dŏ ƀơi Buôn Ky, phường Thành Nhất, plơi prong Buôn Ma Thuột, tơring čar Dak Lak hơmâo khul kyâo bơrơkal mriah djru brơi sa drơi rơmô ania. Truh ră anai, rơmô ania anai hơmâo tuh 2 drơi ană ƀe. Phrâo anai, sang anŏ ñu sĭ ană ƀe kơnô nua ñu 15 klăk prăk kiăng kơ hơmâo prăk tuh pơ alin pơkra drông rông un. Bơ bê ania sang anŏ ñu brơi sang anŏ tơnap tap pơkŏn dong rông. Amai H’Râu brơi thâo: Tơlơi bơwih ƀong huă jai hrơi hơđong, thun hlâo, sang anŏ ñu rơkâo tơbiă mơng sang anŏ ƀun rin.

“Bơni biă mă kơ Khul kyâo bơrơkal mriah plơi prong djru brơi rơmô rông ră anai tơlơi hơdip sang anŏ plai ƀiă tơnap yơh. Sang anŏ ăt amra tŏ tui rông kiăng kơ tuh hrôh, mah tơnap tap ăt khŏm gir run yơh”.

Khul kyâo bơrơkal mraih plơi prong Buôn Ma Thuột pel ĕp hơbô bruă rông rơmô

Tơdơi kơ thun blan rông, rơmô ania mơng sang anŏ amai H’Phiết Niê, dŏ ƀơi ƀuôn K’Mrơng P’rong A, să Ea Tu, plơi prong Buôn Ma Thuột ăt hơmâo tuh hrôh laih. Amai H’Phiết brơi thâo:

“Rơmô ania anai yua kơnuk kơna djru brơi, sang anŏ gơmơi tơnap tap biă mă yua anun arăng djru brơi rơmô ania rông kiăng kơ tuh hrôh, sang anŏ gơmơi lĕ sang anŏ ƀun rin, sang dŏ ăt aka ƀu hơmâo, ră anai hơmâo 1 drơi rơmô rông, truh hrơi rơmô tuh kâo hok mơ-ak mơn, kơnuk kơna brơi hlao ană ƀe, bơ rơmô ania amra tŏ tui rông dong”.

Lu sang anŏ găn rơgao tơnap tap yua mơng bruă rông rơmô

Yă Phạm Khánh Quyên, Khua khul kyâo bơrơkal mriah plơi prong Buôn Ma Thuột, tơring čar Dak Lak brơi thâo, amăng hơdôm thun laih rơgao, Khul hơmâo jao 50 drơi rơmô djru brơi hơdôm sang anŏ tơnap tap, lu hloh lĕ mơnuih djuai ania ƀiă, kiăng kơ pơđĭ kyar bơwih ƀong huă. Hơmâo bruă mă anai hơmâo pok prong tui djop mơta, lơ̆m rơmô ania tuh hrôh, hơdôm sang anŏ amra jao glăi sa drơi ană ƀe ania brơi sang anŏ tơnap pơkŏn dong. Kiăng kơ rơmô ania dưi tuh hrôh na nao, khul plơi prong hơmâo gum hrŏm hăng gơnong bruă pơjrao brơi lông mơnong pơphun pơtô hrăm boh thâo rông rơmô mơng mơnuih ƀon sang.

“Hơbô̆ bruă anai hơmâo djru brơi lu mơnuih. Lu sang anŏ arăng djru lĕ sang anŏ ƀun rin dưi hrưn đĭ jing sang anŏ giăm ƀun rin, bơ sa, dua boh sang anŏ giăm ƀun rin dưi pơklaih mơng ƀun rin laih. Djop sang anŏ ră anai dưi pơđĭ kyar bơwih ƀong huă, hăng ră anai tơlơi hơdip jơnap laih, huăi gơnang nao tơlơi gum djru mơng Kơnuk kơna. Boh tŭ yua mơng bruă rông rơmô anai ăt glăk tŏ tui na nao hăng djop gưl khul grup ăt glăk krăo lăng. Rĭm blan Khul plơi prong ăt pơkiăo nao ƀing apăn bruă kiăng kơ krăo lăng bruă jao glăi hơdôm sang anŏ ƀun rin pơkŏn rông”.

Siu Đoan: Pơblang