VOV4.Jarai - Ding jum pơtô pơhrăm dêh čar ta brơi thâo, phun ñu, jơlan gah ruah čơđai đĭ gưl dlông thun 2022 ăt djă pioh hơđong mơn jơlan gah ruah čơđai kah hăng thun hlâo hăng pơplih pơkra ƀiă gah bôh thâo phrâo. Khă hnun hai, tui hăng Khua mua hơdôm bôh sang hră đại học, khă kơnong kơ pơplih gah hơdră bôh thâo măi mok, samơ̆ hơdôm tơlơi pơkă lăng hlâo pơplih amăng bơyan pơplông ruah čơđai đĭ hrăm gưl dlông thun 2022 ăt bơdjơ̆ nao prong mơn čơđai sang hră hăng hơdôm bôh sang hră, anun kiăng tañ lăi pơthâo tơlơi pơkă ruah čơđai pioh hơdôm bôh sang hră hăng čơđai thâo hăng hmâo kơčăo bruă rơđah. Tui hăng Ding jum pơtô pơhrăm dêh čar ta, hơdră pơtrun pơplih phrâo amăng ruah čơđai đĭ gưl dlông thun 2022 lĕ mă yua dong hơdră măi mok, kiăng gal brơi hloh dong kơ čơđai hăng hơdôm bôh sang hră gưl dlông hrom hăng anun hrŏ trun hơdôm mơta hră pơ-ar. Ding jum pơtô pơhrăm brơi thâo, amra tañ ngă giong hră čih pơkra tơlơi pơkă ruah čơđai đĭ hrăm gưl dlông thun 2022 kiăng rơkâo tơlơi gum pơhiăp tui tơlơi pơkă hlâo kơ mă yua sit nik./.

Siu H’ Prăk: Pơblang