Mông jơnum Grŭp Ping gah 4, Ping gah Sang hră gưl tlâo Hoàng Hoa Thám, tơring glông Lệ Thủy, tơring čar Quảng Bình sit nik biă. Pok blung mông jơnum, mơnuih ping gah ruai kơ hơdôm tơlơi ruai kơ Wa Hồ. Hơdôm hrơi rơgao, amăng hơdôm mông jơnum Ping gah rim tal, hơdôm Grŭp Ping gah ƀơi Ping gah Sang hră gưl tlâo Hoàng Hoa Thám hmâo lăi pơthâo hơdôm tơlơi ruai kơ Wa Hồ pioh hrăm, ngă tui. Amăng anun, črâo rơđah hơdôm mơta bruă akă dưi ngă, akă ngă amăng mơnuih apăn bruă, mơnuih ping gah kiăng ba tơbiă jơlan gah hơkrŭ pơsir, pơplih pơkra ƀudah ngă gru hlâo mơnuih klă, mă bruă klă. Nai Nguyễn Thị Thương, Grŭp ping gah 4, Ping gah Sang hră gưl tlâo Hoàng Hoa Thám, tơring glông Lệ Thủy brơi thâo, hlâo kơ rim mông jơnum, hơdôm mơnuih ping gah prăp lui hơdôm tơlơi ruai tŭ yua ruai kơ Wa Hồ lăi pơthâo hăng mơnuih ping gah amăng grŭp. Anun lĕ hơdôm tơlơi ruai “Ia pơ-iă ia rơ-ŏt”, “Hrơi mông yôm phăn biă”, “Mong bur pơpha tlâo”, “Ao pơđao”, “Dua bĕ tơngan”... Mơng hrơi pok pơhai bôh yôm anai, hơdôm mông jơnum grŭp ping gah dik dak hloh.

 “Hlâo kơ rim mông jơnum Grŭp, ƀing gơmơi ĕp hơdôm hơdrôm hră klă hloh, tơlơi ruai mơ-ak hloh kơ anăn ñu hrăm hăng ngă tui tơlơi pơmin, pran jua, kơnuih Hồ Chí Minh. Rơgao hơdôm tơlơi ruai anai ƀing gơmơi mă tŭ hơdôm tơlơi hrăm kơ drơi pô rim mơnuih ping gah, mơng grŭp ping gah hăng Ping gah khul. Ăt mơng anun mơn lăng ƀuh hơdôm tơlơi kiăng hrăm tui amăng tơlơi hơdip mơda, mơnuih mơnam truh kơ bruă mă”.

Ping gah tơring kual Plah tơsiong Lệ Ninh, tơring glông Lệ Thủy, tơring čar Quảng Bình hmâo giăm truh 500 čô mơnuih ping gah jơnum ƀơi 12 Grŭp ping gah. Rim blan, gưl ping gah pơphun sa mông bơkơtuai, ruah tơbiă hơdôm tơlơi ruai anai, bôh tŭ yua kơ Wa pioh ruai kơ hơdôm ping gah hmư̆ hrom amăng akô̆ mông jơnum grŭp ping gah rim tal. Ơi Nguyễn Thanh Hải, Khua git gai Ping gah Grŭp mơnuih ƀôn sang Liên Cư, tơring kual plah tơsiong Lệ Ninh, tơring glông Lệ Thủy, tơring čar Quảng Bình brơi thâo, pha ra mơng grŭp ping gah lu ñu mơnuih ping gah lĕ mơnuih ngă đang hmua, mơnuih mă bruă anun bruă lăi pơhing ngă tui Tơlơi črâo ba mrô 05 mơng Ding jung kơđi čar khom thâo hluh, sit nik hăng djru hơdôm mơnuih ping gah amra mă yua amăng tơlơi hơdip mơda, bruă mă. Mông jơnum jê̆ hăng anai hloh, hmâo sa dua čô mơnuih ping gah jơnum kaih, bơdjơ̆ nao truh mông jơnum grŭp ping gah. Lom anai, ơi Nguyễn Thanh Hải, Khua git gai Grŭp Ping gah hmâo ruai laih tơlơi ruai kơ Wa Hồ: “Hrơi mông yôm phăn biă – 10 mơnit ăt lĕ kaih mơn”. Rơgao kơ tơlơi ruai anai, gưl ping gah kiăng hơdôm mơnuih ping gah lăng glăi drơi pô, thâo lăng yôm hrơi mông mơng pô, khul grŭp hăng thâo lăng yôm hrơi mông mơng pô pơkon.

 “Mơnuih ping gah ngă tui rim blan, rim 3 blan, rim thun hăng rơnuč thun pơhrua nao hăng pơsit anô̆ klă mơng mơnuih ping gah. Kiăng ngă klă bruă ruai glăi kơ Wa hăng kiăng lar hyu amăng tơlơi hơdip mơda, amăng mơnuih ƀôn sang lĕ tơlơi blung a ƀing gơmơi amăng mông jơnum grŭp, ruah mă lu tơlơi ruai klă kơ Wa, ruai kơ hơdôm gru rơđah kiăng hrăm, ngă tui, amăng anun ăt đing nao črâo rơđah mơn hơdôm tơlơi ƀu klă, ƀu hiam amăng mơnuih apăn bruă, mơnuih ping gah. Tơlơi pơmin mơng ƀing ta lĕ ngă mơng hơdôm bruă anet hloh, ba mut tơlơi hơdip mơda pran jua mơng mơnuih ping gah, thâo hluh rơđah mơng hơdôm tơlơi anet”.

Ping gah tơring glông Lệ Thủy, tơring čar Quảng Bình hmâo 38 grŭp Ping gah hăng 19 Grŭp ping gah hăng 11.800 čô mơnuih ping gah. Ngă tui tơlơi črâo ba mrô 05 kơ pơtrut kơtang hrăm hăng ngă tui tơlơi pơmin, pran jua, kơnuih Hồ Chí Minh, truh ră anai, abih bang Grŭp Ping gah amăng tơring glông pok pơhai bruă ruai kơ tơlơi ruai kơ Wa, gru mơnuih klă mă bruă klă amăng hơdôm jơnum grŭp. Ơi Lê Vĩnh Thế, Khua git gai Ping gah tơring glông Lệ Thủy, tơring čar Quảng Bình brơi thâo, ruai kơ Wa Hồ hmâo djru pơplih laih bôh yôm hăng pơđĭ tui anô̆ klă bruă jơnum Grŭp Ping gah, mơng anun, ngă pơplih klă amăng rim mơnuih apăn bruă, mơnuih ping gah hăng mơnuih ƀôn sang. Hơdôm tơlơi ruai kơ Wa hmâo pran kơtang ngă lar hyu, kiăng mơnuih ping gah, mơnuih ƀôn sang hrăm tui, pơsit rơđah bruă gơgrong mơng pô amăng bruă mă, pran jua hăng amăng tơlơi hơdip mơda:

 “Ƀing gơmơi ba bruă hrăm, ngă tui tơlơi pơmin, pran jua, kơnuih Hồ Chí Minh amăng Tơlơi pơtrun pơsit mơng Jơnum Ping gah hơdôm gưl hăng bruă ngă tui nao hrom hăng bruă kơđi čar ƀơi plơi pla kah hăng amăng: Hrŏ trun ƀun rin, pơsir anih anom dô̆, pơdŏng plơi pla phrâo. Lệ Thủy ăt pơdŏng mơn 5 tơhnal pơkă djơ̆ nao hrom hăng tơlơi pơmin, pran jua Hồ Chí Minh, ba hơdôm khul ping gah, grŭp ping gah nao jơlan pơplih phrâo rơđah kơ rim mơnuih ping gah. Pơkĕ bruă anai nao hrom hăng bruă ngă gru ba jơlan hlâo, mơnuih ping gah ngă gru hlâo hăng pran jua mơnuih ping gah nao hlâo, ană plơi kiăo tui tlôn kiăng ngă tui pran kơtang lu mơta mơng mơnuih ƀôn sang ƀơi plơi pla”./.