Tlam lơ 4/8, Ping gah să Ea Tul, tơring čar Dak Lăk pơphun Jơnum ruah khua ping gah tal sa, rơwang bruă thun 2025-2030. Tơlơi pơtrun mông Jơnum anai kiăng akŏ pơdong să jing să plơi pla phrâo ngă gru mơ̆ng tơring čar. Să Ea Tul hlâo kơ pơmut hrŏm jing sa amăng 6 boh să blung a mơ̆ng tơring čar Dak Lăk dưi ngă hơnong pơkă plơi pla phrâo. Tơdơi kơ pơmut hrŏm, să hơmâo 34.000 čô mơnuih, hăng 12 phung djuai ania; rơbêh ha mơkrah mrô mơnuih lĕ djuai ania Êđê. Prăk pơhrui yap tui akŏ mơnuih amăng să thun 2025 him lăng hơmâo rơbêh 60 klăk. Ping gah să ră anai hơmâo 58 grup ping gah, hăng giăm 900 čô mơnuih ping gah.

Rơwang bruă thun 2025-2030, Ping gah să Ea Tul pơsit hơdră ngă bruă “Pơđĭ kyar bơwih ƀong - mơnuh mơnam jing akŏ phun, akŏ pơdong Ping gah jing yôm hloh, pơđĭ kyar gru grua jing phun atur, pơhlôm pơgang lŏn ia, rơnuk rơnua jing bruă yôm kơtang, ngă re se”; gir jing să plơi pla phrâo ngă gru mơ̆ng tơring čar Dak Lăk, prăk pơhrui yap tui akŏ mơnuih thun 2030 hơmâo 77 klăk prăk./.