Amăng 3 wŏt ƀuh mơnuih ia ƀlung ngă 6 čô djai hơmâo 2 wŏt ƀuh ƀơi plơi prong Kon Tum ngă 3 čô čơđai djai hăng 1 wŏt ƀơi să Hơ Moong, tơring glông Sa Thầy ngă 1 čô mơnuih prong hăng 2 čô čơđai djai. Bruă ƀlung ia giăm hloh amăng lơ 15/8/2024 ƀơi ƀut plơi 5, să Đoàn Kết, plơi prong Kon Tum ngă 2 čô djai. Amăng hrơi mông anun 3 čô čơđai hơmâo: Y La (17 thun); Y Luyẽn (16 thun) hăng Y Lơi (14 thun) lêng kơ dŏ amăng plơi Kon Rờ Bàng 1, să Vinh Quang, plơi prong Kon Tum nao buč pơdai ƀơi hmua pơdai ia ƀut plơi 5, să Đoàn Kết. Tơdơi anun ƀing gơñu ba pơdai nao rao ƀơi dơnao pơkong ia pioh pruih kơphê kơ sang anŏ ơi Đặng Châu Phong, lơm anun 2 čô lĕ Y La hăng Y Luyẽn bor lê̆ trun amăng dơnao ia, ia ƀlung djai hĭ. 

Hrŏm hăng bruă pơkiăo nao tơhan ĕp mơnuih, gong gai, khul grup amăng ƀon lan ƀuh mơnuih ia ƀlung ăt nao tơña bla, jum ala sang anŏ hơmâo mơnuih rơngiă. Laih dong, kơtưn amăng bruă pơtô pơblang, pơhŭi hlâo kơ bruă ƀlung a amra ƀuh amăng ƀon lan.