Dŏng amăng jơlan tuai čuă ngui ia rơsĭ Phan Thiết – Mũi Né – Bàu Trắng – Cổ Thạch, Sang hơduah yang Pô Sah Inư ƀơi kơdư Bà Nài (phường Phú Thủy, tơring čar Lâm Đồng – gah tơring čar Bình Thuận hơđăp) glăk ngă pơhưč tuai čuă ngui tal pơdơi prong. Hơnong ñu rim hrơi anih nao ră anai čơkă mơ̆ng 900-1200 wot čô tuai amăng lŏn ia hăng dêh čar tač rơngiao. Mơ̆ng akô̆ thun truh ră anai, hmâo laih giăm truh 75.000 wot čô tuai nao čuă lăng Sang hơduah yang Pô Sah Inư, tơring čar Lâm Đồng.

Kiăng pơđĭ dlông lông lăng, Grŭp wai lăng gru grua gum hrŏm Grŭp adôh suang tơlơi adôh suang đưm Čăm pơdah pĕ gông atông brô̆, suang tui tơlơi suang đưm pơdah kơ tuai lăng. Tơlơi pơkĕ hrŏm kơplah wah anih anom rơhaih rơ-ơ̆, sang pơdŏng tui gru đưm hăng er adôh đưm hmâo ngă pơhưč phara ha jăn biă. Kơnong amăng blan 6, kual Bình Thuận hơđăp čơkă hmâo rơbêh kơ 1 klăk wot čô tuai. Abih bang 6 blan akô̆ thun 2025, kual anai čơkă rơbêh kơ 5,5 klăk wot čô tuai, đĭ giăm truh 20% bơhmu hăng thun hlâo; pơhrui hmâo mơ̆ng tuai čuă ngui rơbêh 15.000 klai prăk./.